យោធាអ៊ីស្រាអែល នៅថ្ងៃអង្គារ (ទី១៧ ខែតុលា) បានបន្តដាក់រថក្រោះ និងរថពាសដែកយ៉ាងច្រើន នៅតាមព្រំដែនហ្គាហ្សា ដើម្បីរៀបចំ សម្រាប់ការវាយលុកផ្លូវគោក ក្នុងគោលបំណងកំណត់គោលដៅក្រុមហាម៉ាស និងហេដ្ឋារចនាសម្ព័ន្ធ នៅលើដែនដី ក្នុងតំបន់នេះ ដើម្បីឆ្លើយតបទៅនឹងការវាយប្រហារដ៏សាហាវ កាលពីសប្តាហ៍មុន។

អ៊ីស្រាអែលនឹងបង្កើនការវាយលុកប្រឆាំងក្រុមសកម្មប្រយុទ្ធហាម៉ាស ដែលបានបង្កើតឲ្យមានវិបត្តិមនុស្សធម៌ នៅតំបន់ហ្គាហ្សា និងបានបង្កើនការភ័យខ្លាចនៃការមានជម្លោះកាន់តែទូលំទូលាយ ជាមួយប្រទេសអ៊ីរ៉ង់។

អ៊ីស្រាអែល បានដាក់តំបន់ហ្គាហ្សា ដែលជាជម្រករបស់ជនជាតិប៉ាឡេស្ទីន ២,៣លាននាក់ នៅក្រោមការបិទខ្ទប់ទាំងស្រុង និងវាយលុកតំបន់នេះជាមួយនឹងការវាយប្រហារតាមអាកាស ដែលមិនធ្លាប់មានពីមុនមក បន្ទាប់ពីក្រុមយុទ្ធជនហាម៉ាស បានវាយលុកទីក្រុងនានារបស់អ៊ីស្រាអែល កាលពី ៨ថ្ងៃមុន ដោយបានសម្លាប់មនុស្សយ៉ាងហោចណាស់ ១.៣០០នាក់ នៅក្នុងការវាយប្រហារដ៏អាក្រក់បំផុតលើជនស៊ីវិល ក្នុងប្រវត្តិសាស្ត្ររបស់ប្រទេស។

អាជ្ញាធរ នៅតំបន់ហ្គាហ្សា បាននិយាយថា យ៉ាងហោចណាស់មនុស្ស ២.៨០០នាក់ ត្រូវបានសម្លាប់ នៅទីនោះ ដោយប្រហែល ១ភាគ៤ នៃជនរងគ្រោះជាកុមារ។

ក្រុមអ្នកការទូតអន្តរជាតិ បានផ្តោតទៅលើមនុស្សធម៌ និងការទប់ស្កាត់ការរីករាលដាលនៃជម្លោះ ជាពិសេស ចូលទៅក្នុងប្រទេសលីបង់ ជាកន្លែង ដែលពួកសកម្មប្រយុទ្ធ Hezbollah ដែលគាំទ្រដោយអ៊ីរ៉ង់ បាន និងកំពុងបាញ់ប្រហារជាមួយអ៊ីស្រាអែលឆ្លងកាត់ព្រំដែនជាច្រើនថ្ងៃ៕