ភ្នំពេញ ៖ លោក វឿន វុទី្ធ ប្រធាននាយកដ្ឋានបុរាណវិទ្យា និងបុរេប្រវតិ្តវិទ្យា នៃក្រសួងវប្បធម៌ និងវិចិត្រសិល្បៈ ប្រាប់BTV ព័ត៌មាន នាព្រឹកថ្ងៃទី៤ ខែមិថុនា ឆ្នាំ២០២១នេះថា ការធ្វើកំណាយសង្គ្រោះផ្លូវវាងក្រវ៉ាត់ក្រុងទី៣ ស្ថិតនៅភូមិបុណ្ណា ឃុំព្រះពុទ្ធ ស្រុកកណ្តាលស្ទឹង ខេត្តកណ្តាល បានរកឃើញភស្តុតាងប្រវតិ្តសាស្ត្រ របស់មនុស្សរស់នៅក្នុងសម័យដើមជាច្រើន ស្ថិតក្នុងសត វត្សរ៍ទី២។
លោក បន្តទៀតថា ការធ្វើកំណាយសង្គ្រោះផ្លូវវាងក្រវ៉ាត់ក្រុងទី៣នេះ គឺធ្វើឡើងដើម្បីការអភិវឌ្ឍន៍ប្រទេសជាតិ និងសេចកី្តសុខរបស់ប្រជាពលរដ្ឋកម្ពុជា។ កិច្ចការខាងលើនេះ គឺក្រសួងវប្បធម៌ និងវិចិត្រសិល្បៈ សហការជាមួយក្រសួងសាធារណការ និងដឹកជញ្ជូន ក្រសួងសេដ្ឋកិច្ច និងហិរញ្ញវត្ថុ ហើយ និងក្រុមហ៊ុនសាងសង់ផ្លូវ SCG បានបើកការធ្វើកំណាយសង្គ្រោះស្ថានីយទួលអស់លោក ចាប់ផ្តើមពីថ្ងៃទី១៩ ខែឧសភា រហូតដល់ថ្ងៃទី០៥ ខែមិថុនា ឆ្នាំ២០២១ ដែលមានរយៈពេល៣សប្តាហ៍។ ប៉ុន្តែគម្រោងក្នុងការធ្វើកំណាយសង្គ្រោះនេះ ត្រូវបានបញ្ចប់មុនកាលកំណត់។
លោក វឿន វុទី្ធ បានបញ្ជាក់ទៀតថា ក្នុងដំណើរការធ្វើកំណាយនេះ មានមន្ត្រីចូលរួមចំនួន២៨នាក់ បានរកឃើញសមុច្ច័យជាច្រើន ដែលទទួលបានក្រោយការធ្វើកំណាយ ទន្ទឹមនឹងនោះមន្ត្រីជំនាញ បានដឹកយកមករក្សាទុកនៅមនី្ទរពិសោធន៍ ក្នុងនោះ មានមន្រី្តជំនាញចំនួន១០នាក់ទៀត បានធ្វើការសិក្សាវិភាគបន្តនៅក្នុងក្រសួងវប្បធម៌ និងវិចិត្រសិល្បៈ៕
អត្ថបទ រដ្ឋា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
