នៅថ្ងៃអង្គរនេះ ពលរដ្ឋតំបន់ហ្គាហ្សានៅជំរំជនភៀសខ្លួន Jabalia បានប្រញាប់ប្រញាល់ទៅកាន់កន្លែងកើតហេតុ ជាកន្លែងដែលរងការវាយប្រហារតាមច្រកអកាសរបស់អ៊ីស្រាអែល ដើម្បីស្វែងរកអ្នករស់រាន ។

 សាកសពមនុស្សជាច្រើន និងអ្នករងរបួស ត្រូវបានគេសែងលើគ្រែស្នែង ស្របពេលដែលអ៊ីស្រាអែល បង្កើនការវាយប្រហាររបស់ខ្លួនលើតំបន់ហ្គាហ្សាស្រ្ទីប ។

 ក្រុមខ្មាន់កាំភ្លើងហាម៉ាស់ បានសម្លាប់មនុស្ស ១.៣០០នាក់ អំឡុងការវាយឆ្មក់របស់ពួកគេនៅតាមទីក្រុងភាគខាងត្បូងរបស់អ៊ីស្រាអែល កាលពីថ្ងៃទី ៧ ខែតុលា ដែលជាការវាយប្រហារសម្លាប់មនុស្សច្រើនបំផុតរយៈពេល ១ថ្ងៃនៅក្នុងប្រវត្តិសាស្រ្តរយៈពេល ៧៥ឆ្នាំរបស់អ៊ីស្រាអែល ។

 អ៊ីស្រាអែល បានឆ្លើយតបវិញជាមួយនឹងការរឹតបន្តឹងការបិទច្រកព្រំដែនលើតំបន់ហ្គាហ្សាដែលគ្រប់គ្រងដោយក្រុមហាម៉ាស់ តាមរយៈរឹតត្បិតការចូលរបស់ប្រេងឥន្ធនៈ ហើយនិងទម្លាក់គ្រាប់បែកលើតំបន់មួយនេះ ជាមួយនឹងការវាយប្រហារតាមច្រកអាកាស ដោយបានសម្លាប់ជនប៉ាឡេស្ទីនរាប់ពាន់នាក់ និងមនុស្សរាប់ម៉ឺននាក់ផ្សេងទៀត រត់ភៀសខ្លួន ។

 ខណៈពេលនោះដែរ ក្រុមគ្រូពេទ្យ បានទាញអ្នករស់រាននៅក្រោមគំនរបាក់បែកអគាររងការបំផ្លិចបំផ្លាញ បន្ទាប់ពីការវាយប្រហារទាំងយប់របស់អ៊ីស្រាអែលនៅទីក្រុង Khan Younis ស្ថិតនៅភាគខាងត្បូងតំបន់ហ្គាហ្សា ។

 ក្រសួងមហាផ្ទៃតំបន់ហ្គាហ្សា និយាយនៅថ្ងៃអង្គារនេះថា ជនប៉ាឡេស្ទីនយ៉ាងហោច ៤៩នាក់ ត្រូវបានសម្លាប់អំឡុងការវាយប្រហារទៅលើផ្ទះសម្បែងពលរដ្ឋនៅទីក្រុង Khan Younis និងតំបន់ព្រំដែន Rafah ។

 អ៊ីស្រាអែល បាននិយាយកាលពីថ្ងៃចន្ទថា គ្មានបទឈប់បាញ់ណាមួយ ត្រូវបានអនុវត្តន៍នោះទេនៅតំបន់ភាគខាងត្បូងហ្គាហ្សា បើទោះបីជាប្រភពសន្តិសុខនៅប្រទេសអេហ្ស៊ីប និយាយថា កិច្ចព្រមព្រៀងត្រូវបានឈានដល់ ដើម្បីអនុញ្ញាតឲ្យជនបរទេសចាកចេញពីតំបន់ឡោមព័ទ្ធមួយនេះ ហើយនិងដើម្បីអនុញ្ញាតឲ្យជំនួយមនុស្សធម៌ចូល ។

 យោងតាមការអះអាងរបស់ក្រសួងសុខាភិបាលតំបន់ហ្គាហ្សា បានឲ្យដឹងថា ជនប៉ាឡេស្ទីន ២.៧៥០នាក់ ត្រូវបានសម្លាប់ ហើយមនុស្ស ៩.៧០០នាក់ បានរងរបួស ដោយសារការវាយប្រហាររបស់អ៊ីស្រាអែលលើតំបន់ហ្គាហ្សា ចាប់តាំងពីថ្ងៃទី ៧ ខែតុលារហូតមក ៕