ប្រជាពលរដ្ឋតំបន់ហ្គាហ្សាដែលមានសញ្ជាតិ ២ បានធ្វើដំណើររាល់ថ្ងៃទៅកាន់ច្រកឆ្លងកាត់ព្រំដែន Rafah ដោយសារសង្ឃឹមថានឹងត្រូវបានគេអនុញ្ញាតឲ្យឆ្លងកាត់ចូលក្នុងប្រទេសអេហ្ស៊ីប ដើម្បីឲ្យពួកគេអាចវិលត្រឡប់ទៅកាន់ប្រទេសរបស់ពួកគេវិញ ស្របពេលកើតមានសង្រ្គាមរវាងក្រុមហាម៉ាស់ និងអ៊ីស្រាអែល ។

ប្រជាពលរដ្ឋទាំងអស់នេះ និយាយថា ពួកគេត្រូវបាននិយាយប្រាប់ដោយស្ថានទូតរបស់ពួកគេឲ្យធ្វើដំណើរទៅកាន់ច្រកឆ្លងកាត់ព្រំដែន តែព្រំដែនពុំទាន់បើកនោះទេ ។

លោក Jamil Safi ដែលជាពលរដ្ឋតំបន់ហ្គាហ្សមានសញ្ជាតិស៊ុយអែត និយាយថា ខ្ញុំរស់នៅតំបន់ភាគខាងជើង ហើយខ្ញុំមិនអាចវិលត្រឡប់ទៅកាន់តំបន់ភាគខាងជើងបានទៀតហើយ ។ ស្ថានភាពកាន់តែគ្រោះថ្នាក់ខ្លាំងជាងការរំពឹងទុកទៅទៀត ។

គួរឲ្យដឹងថា ច្រកព្រំដែន Rafah គឺជាច្រកឆ្លងកាត់ព្រំដែនតែមួយគត់ ចូលទៅកាន់ដែនដីដែលមិនគ្រប់គ្រងដោយអ៊ីស្រាអែល ។

ក្រុមការងារអន្តរជាតិ បានអំពាវនាវឲ្យមានបទឈប់បាញ់មនុស្សធម៌ ដើម្បីអនុញ្ញាតឲ្យមានច្រកសុវត្ថិភាពសម្រាប់ជំនួយ និងអ្នកដែលចង់ចាកចេញពីតំបន់ហ្គាហ្សា ៕