អ្នកតំណាងពិសេសសហរដ្ឋអាមេរិកសម្រាប់បញ្ហាកូរ៉េខាងជើងលោក Sung Kim នៅថ្ងៃអង្គារនេះ បានចាត់ទុកទំនាក់ទំនងរវាងកូរ៉េខាងជើង និងរុស្ស៊ី ថាគួរឲ្យព្រួយបារម្ភ ក្រោយពេលដែលសេតវិមាន និយាយកាលពីសប្តាហ៍មុនថា ទីក្រុងព្យុងយ៉ាង បានដឹកជញ្ជូនអាវុធឲ្យរុស្ស៊ីកាលពីពេលថ្មីៗកន្លងមកនេះ ។

 ថ្លែងទៅកាន់ក្រុមអ្នកសារព័ត៌មាន ក្រោយជំនួបជាមួយសមភាគីកូរ៉េខាងត្បូង និងជប៉ុននៅក្នុងទីក្រុងហ្សាកាតា ប្រទេសឥណ្ឌូនេស៊ី លោក Kim និយាយថា ទីក្រុងវ៉ាស៊ីងតោន នឹងបន្តពង្រឹងកិច្ចខិតខំដើម្បីការពារសម្ព័ន្ធមិត្តរបស់ខ្លួន ។

 លោកបន្តថា កាលពីថ្ងៃសុក្រសប្តាហ៍មុន ពួកយើងបានមើលឃើញភស្តុតាងបន្ថែមទៀតពីកិច្ចសហប្រតិបត្តិការយោធានៅបន្តរវាងទីក្រុងព្យុងយ៉ាង និងទីក្រុងម៉ូស្គូ ។ ការផ្តល់គ្រឿងយុទ្ធោបករណ៍ និងគ្រាប់រំសេវរបស់កូរ៉េខាងជើង ដល់រុស្ស៊ី ហើយនិងការផ្ទេរបច្ចេកវិទ្យាពាក់ព័ន្ធនឹងមីស៊ីល ឬនុយក្លេអ៊ែររវាងកូរ៉េខាងជើង និងរុស្ស៊ី បានបំពានយ៉ាងធ្ងន់ធ្ងរលើសេចក្តីសម្រេចរបស់ក្រុមប្រឹក្សាអង្គការសហប្រជាជាតិ ។ វាបានគំរាមកំហែងយ៉ាងធ្ងន់ធ្ងរដល់សន្តិសុខរបស់ពួកយើងផងដែរ ហើយពួកយើងនឹងបន្តធ្វើការរួមគ្នានៅក្នុងការឆ្លើយតបរបស់ពួកយើង ។

 ទោះបីជាយ៉ាងណាក៏ដោយ វិមានក្រឹមឡាំង បាននិយាយនៅថ្ងៃអង្គារនេះថា ការចោទប្រកាន់របស់លោកខាងលិចថា កូរ៉េខាងជើងផ្គត់ផ្គង់អាវុធដល់ខ្លួន គឺពុំផ្អែកលើភស្តុតាងជាក់ស្តែងនោះទេ ៕