សភារបស់រុស្ស៊ី បានចាត់វិធានការដំបូង នៅថ្ងៃអង្គារ (ទី១៧ ខែតុលា) នេះ ក្នុងការឈានឆ្ពោះទៅរកការលុបចោលនូវការផ្តល់សច្ចាប័នលើសន្ធិសញ្ញាហាមប្រាមការសាកល្បងនុយក្លេអ៊ែរគ្រប់ជ្រុងជ្រោយ ដោយដាក់ការស្តីបន្ទោសនូវអ្វី ដែលសមាជិកសភាជាន់ខ្ពស់មួយរូបហៅថា ជាទង្វើមិនទទួលខុសត្រូវរបស់សហរដ្ឋអាមេរិក ចំពោះសន្តិសុខពិភពលោក។

សភាជាន់ទាបរបស់សភាតំណាងរាស្ត្រ ឬ Duma បានបោះឆ្នោតដោយសំឡេង ៤១២សំឡេងទល់នឹងសូន្យ ដោយមិនមានអនុបវាទ ដើម្បីអនុម័តការដកនូវការផ្តល់សច្ចាប័ន ក្នុងដំណើរការលើកដំបូង ក្នុងចំណោមដំណើរការពិនិត្យសេចក្ដីស្នើច្បាប់ទាំង៣។ ប្រទេសរុស្ស៊ីឲ្យដឹងថា គោលបំណងនេះ គឺដើម្បីស្ដារឡើងវិញនូវសមភាពរបស់ខ្លួនជាមួយសហរដ្ឋអាមេរិក ដែលបានចុះហត្ថលេខា ប៉ុន្តែមិនផ្តល់សច្ចាប័នលើសន្ធិសញ្ញាឆ្នាំ១៩៩៦ នេះឡើយ ហើយថា ខ្លួននឹងមិនចាប់ផ្ដើមការសាកល្បងឡើងវិញទេ ប្រសិនបើទីក្រុងវ៉ាស៊ីនតោនមិនធ្វើបែបនោះ។

ប៉ុន្តែអ្នកជំនាញផ្នែកគ្រប់គ្រងអាវុធមួយចំនួន មានការបារម្ភថា រុស្ស៊ីអាចនឹងឈានទៅរកការសាកល្បង ដែលនឹងត្រូវបានលោកខាងលិខយល់ថា ជាសញ្ញាគំរាមកំហែងមួយ នៅពេលដែលមានការប្រឈមមុខដាក់គ្នាកាន់តែខ្លាំងឡើងៗ ជុំវិញសង្គ្រាមរុស្ស៊ី នៅអ៊ុយក្រែន។

នៅសតវត្សរ៍នេះ គ្មានប្រទេសណានោះឡើយ បានធ្វើតេស្ដពាក់ព័ន្ធនឹងការបំផ្ទុះនុយក្លេអ៊ែរ លើកលែងតែកូរ៉េខាងជើង។ យ៉ាងហោចណាស់អ្នកជំនាញសន្តិសុខរុស្ស៊ីជាន់ខ្ពស់ម្នាក់ បាននិយាយថា រុស្ស៊ីគួរតែសាកល្បងគ្រាប់បែកនុយក្លេអ៊ែរជាការព្រមានដល់លោកខាងលិច ប៉ុន្តែប្រធានាធិបតីលោក Vladimir Putin បាននិយាយកាលពីថ្ងៃទី៥ ខែតុលាថា លោកមិនទាន់ត្រៀមខ្លួននោះទេ ក្នុងការនិយាយថា តើត្រូវការការសាកល្បង ឬអត់៕