យោធាអ៊ីស្រាអែល បានឲ្យដឹងថា ខ្លួនបានសម្លាប់មនុស្ស ៤នាក់ ដែលបានព្យាយាមឆ្លងកាត់របងបែងចែកព្រំដែនប្រទេសលីបង់ ហើយបង្កប់ឧបករណ៍បំផ្ទុះ ខណៈអំពើហិង្សា ដែលបានឆាបឆេះឡើងវិញ ដោយសារសង្គ្រាម រវាងអ៊ីស្រាអែល និងក្រុមហាម៉ាសប៉ាឡេស្ទីន បានផ្ទុះឡើងនៅតាមព្រំដែននេះ។

វីដេអូដែលចេញផ្សាយដោយកងកម្លាំងការពារជាតិអ៊ីស្រាអែល នៅថ្ងៃអង្គារ (ទី១៧ ខែតុលា) នេះ បង្ហាញពីអ្វី ដែលគេនិយាយថា ជាការវាយប្រហារដោយកាំភ្លើងធំទៅលើបុគ្គល ៤នាក់ នៅជិតរបងព្រំដែន ដោយសារបានឃើញតាមរយៈឧបករណ៍កំណត់គោលដៅ។ សេចក្តីថ្លែងការណ៍របស់កងទ័ពអ៊ីស្រាអែលមិនបាននិយាយថា ឧបទ្ទវហេតុនេះបានកើតឡើងនៅទីណានោះទេ។

ក្រុម Hezbollah ដែលគាំទ្រដោយអ៊ីរ៉ង់ និងដែលប្រដាប់ដោយអាវុធធុនធ្ងន់ បានកំពុងបាញ់គ្នាទៅវិញទៅមកជាមួយកងកម្លាំងអ៊ីស្រាអែលនៅតាមព្រំដែនស្ទើរតែរាល់ថ្ងៃ ដែលជាការកើនឡើងនូវជម្លោះដ៏ខ្លាំងក្លាបំផុតនៅតាមព្រំដែន គិតចាប់តាំងពីការផ្ទុះសង្គ្រាមដ៏ធំមួយ កាលពី ១៧ឆ្នាំមុន៕