កងពលតូចដឹកជញ្ជូនលេខ៩៩បានប្រកាសថា ខ្លួនបានបន្តត្រៀមកម្លាំង, រថយន្តធំ, និងឧបករណ៍នានាជាច្រើនទៀតគ្រប់ពេលវេលាទាំងអស់ ដើម្បីអន្តរាគមន៍ជួយសង្រ្គោះបងប្អូនប្រជាពលរដ្ឋដែលរងគ្រោះ ដោយសារគ្រោះធម្មជាតិ ជាពិសេសបញ្ហាគ្រោះទឹកជំនន់ ដែលកំពុងកើតឡើងនាពេលនេះ។
ថ្លែងប្រាប់ទូរទស្សន៍ BTV តាមរយៈសាអេឡិចត្រូនិច(តេលេក្រាម) នៅថ្ងៃទី១៨ ខែតុលា ឆ្នាំ២០២៣នេះ លោកឧត្តមសេនីយ៍ត្រី ហ៊ុល វណ្ឌី មេបញ្ជាការរង និងជានាយសេនាធិការកងពលតូចដឹក ជញ្ជូនលេខ៩៩ បានបញ្ជាក់ថា ក្រោយពីមានបទបញ្ជាពីអគ្គភស្តុភា ក៏ដូចជាក្រសួងការពារជាតិតាំងពីមុនបុណ្យភ្ជុំបិណ្ឌមក កងពលដឹកជញ្ជូនលេខ៩៩ បានត្រៀមកម្លាំងជាងពីររយនាក់ រថយន្តខ្នាតធំជាង៦០ គ្រឿង ទូកម៉ាស៊ីន(អូប័រ)១១គ្រឿង ម៉ាស៊ីនបូមទឹក៣០គ្រឿង និងសម្ភារៈសង្រ្គោះជាច្រើនទៀត ដើម្បី ត្រៀមចេញអន្តរាគមន៍គ្រប់ពេលវេលាទាំងអស់ជួយដល់បងប្អូនប្រជាពលរដ្ឋពេលជួបគ្រោះដោយសារទឹក ជំនន់មិនថានៅទីជិត ឬឆ្ងាយនោះឡើយ។
លោកឧត្តមសេនីយ៍ត្រី ហ៊ុល វណ្ឌី បានតាំងចិត្តផងដែរថា កងកម្លាំងយោធា នៃកងពលតូចដឹកជញ្ជូនលេខ៩៩ គ្មានការរុញរានោះឡើយក្នុងការអន្តរាគមន៍ជួយសង្រ្គោះប្រជាជនពេលជួបបញ្ហា មិនថាយប់ ឬថ្ងៃនោះទេជាក់ស្តែងដូចសកម្មភាពអ្វីដែលក្រុមការងាររបស់លោកបានធ្វើនាពេលកន្លងមកយ៉ាងដូច្នេះដែរ ដោយការចុះជួយពល រដ្ឋរងគ្រោះនេះអស់ពីកម្លាំងកាយចិត្តគ្មានការអល់អែកនោះឡើយ ពោល មានបទបញ្ជាស្មើណាកម្លាំងនៃកងពលនឹងចេញស្មើនោះតែម្តង។
ជាមួយគ្នានោះដែរ លោកឧត្តមសេនីយ៍ត្រី ហ៊ុល វណ្ឌី ក៏បានលើកឡើងផងដែរថា ស្របតាមកំណែទម្រង់របស់រាជរដ្ឋាភិបាល ក៏ដូចជាក្រសួងការពារជាតិ កម្លាំងនៃកងពលតូចដឹកជញ្ជូនលេខ៩៩ ក៏បានធ្វើការហ្វឹកហាត់ និងធ្វើសមយុទ្ធជាប្រចាំជាមួយភាគីដទៃទៀត លើជំនាញសង្រ្គោះបន្ទាន់ ដើម្បីជួយដល់បងប្អូនប្រជាពលរដ្ឋឲ្យបានទាន់ពេលវេលាពេលដែលជួបគ្រោះធម្មជាតិ ដូចជាករណីខ្យល់កន្រ្តាក់ គ្រោះរាំងស្ងួត និងទឹកជំនន់ជាដើម៕ អត្ថបទ៖ បាន ចក់
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
