អាមេរិក៖ ប្រធានាធិបតី​អាមេរិក​លោក Joe Biden គ្រោង​នឹង​ដាក់​បម្រាម​លើ​ជនជាតិ​អាមេរិក​ មិន​ឱ្យ​វិនិយោគ​នៅ​ក្នុង​ក្រុមហ៊ុន​បច្ចេកវិទ្យា និង​ការពារ​ជាតិ​រាប់​សិប​អង្គភាព​របស់​ប្រទេស​ចិន​ ដែល​មាន​ជាប់​ទាក់​ទង​នឹង​យោធា​។​

ក្រឹត្យ​ថ្មី​នេះ​នឹង​ចូល​ជា​ធរមាន​នៅ​ថ្ងៃ​ទី​២ ខែ​សីហា​ខាងមុខនេះ ដែល​នឹង​ប៉ះពាល់​ដល់​ក្រុមហ៊ុន​ចំនួន ៥៩ ក្នុង​នោះ​មាន​ក្រុមហ៊ុន​ទូរគមនាគមន៍​ខ្នាត​យក្ស Huawei ផង​ដែរ​។ បញ្ជី​ឈ្មោះ​ក្រុមហ៊ុន​នឹង​ត្រូវ​ធ្វើ​បច្ចុប្បន្ន​ភាពជា​មូលដ្ឋាន​។​ វិធានការ​នេះ​នឹង​បន្ថែម​ពីលើ​ក្រឹត្យ​ដែល​ចេញ​ដោយ អតីត​ប្រធានាធិបតី លោក Donald Trump សូម្បីតែ​មុន​ពេល​ការប្រកាស​ជា​ផ្លូវការ​ក៏ដោយ ក៏​ប្រទេស​ចិន​បាន​លើក​ឡើង​ថា​ ខ្លួន​សងសឹក​វិញ​ដែរ​។​ ក្រោម​បទបញ្ជា​ថ្មី វិនិយោគិន​អាមេរិក​នឹង​ត្រូវ​ហាមឃាត់​មិន​ឱ្យ​ទិញ​ ឬ​លក់​មូលប័ត្រ​ដែល​ធ្វើ​ពាណិជ្ជកម្ម​ជា​សាធារណៈ ​សម្រាប់​ក្រុមហ៊ុន​ផ្សេងទៀត ​រួមមាន​សាជីវកម្ម​ថាមពល​នុយក្លេអ៊ែរ​ទូទៅ​របស់​ចិន​ក្រុម​ហ៊ុន China Mobile Limited និង​ក្រុមហ៊ុន Costar Group។​

​មន្ត្រី​មួយ​រូប​នៅ​សេត​វិមាន​បាន​និយាយ​ថា ​បទបញ្ជា​នេះ​នឹង​បន្ថែម​បញ្ជី​កាលពី​កន្លងទៅ​ ដែល​មាន​ក្រុមហ៊ុន​ចំនួន​ ៣១ ដើម្បី​ដាក់បញ្ចូល​ក្រុមហ៊ុន​ផលិត​កាមេរ៉ា​សុវត្ថិភាព និង​មាន​គោល​បំណង​ធានា​ថា​ ប្រជាជន​អាមេរិក​មិន​អាច​ផ្ដល់​ហិរញ្ញប្បទាន ​ដល់​ឧស្សាហកម្ម​យោធា​របស់​សាធារណរដ្ឋ​ប្រជាមានិត​ចិន​បាន​ឡើយ​៕

អត្ថបទ៖ សុខមាន