ភ្នំពេញ ៖ ប្រជាពលរដ្ឋរស់នៅក្នុងមូលដ្ឋានខណ្ឌដូនពេញបានស្នើរឱ្យអាជ្ញាធររាជធានីភ្នំពេញ ចាត់​វិធានការ និងយកសត្វស្វាចេញឱ្យអស់ពីមូលដ្ឋានរស់នៅរបស់គាត់ ដោយសារ​តែ​ស្វា​បាន​យាយី ​និងរំខានដល់ការរស់នៅ និងការប្រកបរបរផ្សេងៗ។

ការស្នើរសុំរបស់ប្រជាពលរដ្ឋនេះបានធ្វើឡើងនាព្រឹកថ្ងៃទី១៨ ខែតុលា ឆ្នាំ២០២៣នេះ នៅក្នុង​វេទិកា​ផ្សព្វ​ផ្សាយ និងពិគ្រោះយោបល់របស់ក្រុមប្រឹក្សារាជធានី អាណត្តិទី៣ ឆ្នាំ២០២៣ ដែល​ធ្វើ​ឡើង​ក្រោម​អធិបតីភាព ឯកឧត្តម ជួប ខុន សមាជិកក្រុមប្រឹក្សា រាជធានីភ្នំពេញ និងលោក សុខ ពេញវុធ អភិបាលរងរាជធានីភ្នំពេញ។

ក្នុងវេទិកាផ្សព្វផ្សាយ និង​ពិគ្រោះ​យោបល់​នេះ​ដែរ​ប្រជាពលរដ្ឋ​ក៏​បាន​ស្នើ​ឱ្យ​ដោះស្រាយ​ចំពោះ​ក្រុមហ៊ុន​ឯកជនខួងដីនាំឱ្យស្រុតផ្ទះ និងមិនអនុវត្តតាមកិច្ចសន្យា សំណូមពរ​កុំឱ្យយក​ថវិកា​ថ្លៃ​សំរាម​នៅ​តាមគ្រឹះស្ឋានសិក្សារបស់រដ្ឋ និងសូមឱ្យមានការគាំទ្រផលិតផលខ្មែរដូចគ្នា។

លោក សុខ ពេញវុធ បានមានប្រសាសន៍ថា ក្នុងវេទិកាផ្សព្វផ្សាយ និង​ពិគ្រោះ​យោបល់​នៅ​ខណ្ឌ​ដូន​ពេញ​នេះ មានប្រជាពលរដ្ឋលើកឡើងជាសំណើរ និងសំណូមពរផ្ទាល់មាត់ចំនួន ៨នាក់ ស្នើ​និង​១៥​បញ្ហា និងជាលាយលក្ខណ៍អក្សរចំនួន ៤០បញ្ហា។ ចំពោះសំណើរ និង​សំណូមពរ​ផ្ទាល់​មាត់​អាជ្ញាធរ​បាន​ដោះស្រាយបញ្ចាប់រួចរាល់។ ចំពោះសំណើរ​ជាលាយ​លក្ខណ៍​អក្សរ​ចំនួន​៤០​បញ្ហា​នឹង​បញ្ចូលទៅក្នុងគម្រោងផែនការអភិវឌ្ឍន៍៣ឆ្នាំរំកិល ហើយអ្វីដែល​នៅ​សេសសល់​នឹង​បន្ត​ដោះ​ស្រាយ​ជាបន្តបន្ទាប់ទៀត។

ឯកឧត្តម ជួប ខុន បានមានប្រសាសន៍ថា ក្នុងវេទិការផ្សព្វផ្សាយ និង​ពិគ្រោះយោ​បល់​របស់​ក្រុម​ប្រឹក្សា​រាជ​ធានីភ្នំពេញនៅទូទាំង១៤ខណ្ឌនៃរាជធានី កាលពីឆ្នាំ២០២២កន្លងទៅ ប្រជា​ពលរដ្ឋ​បាន​លើក​ឡើងជាសំណើរ និងសំណូមពរចំនួន ៨៧០បញ្ហា ដើម្បីឱ្យអាជ្ញាធរ​រាជធានី​ភ្នំពេញ​ជួយ​ដោះ​ស្រាយ​ជូន។ ក្នុងចំនួននេះរដ្ឋបាលរាជធានីភ្នំពេញ បានដោះស្រាយជូនរួចរាល់ចំនួន ៤៤៤​បញ្ហា បានដាក់ចូលក្នុងគម្រោងអភិវឌ្ឍន៍៣ឆ្នាំរំកិលចំនួន ២១៧បញ្ហា និងនៅសល់ ១០១បញ្ហា មិន​ទាន់បានដោះស្រាយ ដោយសារតែហួសពីដែនសមត្ថកិច្ចរបស់អាជ្ញាធររាជធានីភ្នំពេញ៕ អត្ថបទ ៖ ប្រាក់ វ៉ាន់ដា