មន្ត្រីជាន់ខ្ពស់មកពីប្រទេសជប៉ុន សហរដ្ឋអាមេរិក និងកូរ៉េខាងត្បូង បានព្រមព្រៀងធ្វើការជាមួយគ្នាយ៉ាងជិតស្និទ្ធ ដើម្បីឈានឆ្ពោះទៅរកការរំសាយអាវុធនុយក្លេអ៊ែរទាំងស្រុងរបស់ប្រទេសកូរ៉េខាងជើង។ នេះបើតាមលោក Namazu Hiroyuki ដែលជាអគ្គនាយកនៃការិយាល័យកិច្ចការអាស៊ី និងមហាសមុទ្រនៃក្រសួងការបរទេសជប៉ុន។

លោក Hiroyuki បានជួបជាមួយតំណាងពិសេសរបស់សហរដ្ឋអាមេរិកប្រចាំនៅប្រទេសកូរ៉េខាងជើង លោក Sung Kim និងតំណាងពិសេសរបស់កូរ៉េខាងត្បូងទទួលបន្ទុកកិច្ចការសន្តិភាពនិងសន្តិសុខឧបទ្វីបកូរ៉េ លោក Kim Gunn នៅក្នុងរដ្ឋធានីហ្សាការតា ប្រទេសឥណ្ឌូនេស៊ី កាលពីថ្ងៃអង្គារ (ទី១៧ ខែតុលា)។

ភាគីតំណាងឲ្យប្រទេសទាំង៣ បានសង្កត់ធ្ងន់ថា ពួកគេជឿថា ការបាញ់មីស៊ីលបាលីស្ទិកជាញឹកញាប់មិនធ្លាប់មានរបស់កូរ៉េខាងជើង បង្កជាបញ្ហាប្រឈមច្បាស់ក្រឡែត និងធ្ងន់ធ្ងរដល់សហគមន៍អន្តរជាតិ។

មន្ត្រីជាន់ខ្ពស់នៃភាគីទាំង៣ បានសន្យាថា នឹងសហការគ្នាដើម្បីធ្វើយ៉ាងណាឲ្យកូរ៉េខាងជើងអត់មានអាវុធនុយក្លេអ៊ែរទាំងស្រុង។ ពួកលោកបានលើកឡើងពីកិច្ចព្រមព្រៀង ដែលមេដឹកនាំនៃប្រទេសទាំង៣ សម្រេចបានក្នុងកិច្ចប្រជុំកំពូលមួយ កាលពីខែសីហា។ ជំនួបនោះត្រូវបានធ្វើឡើងនៅឯកន្លែងសម្រាកលំហែរបស់ប្រធានាធិបតី Camp David ជិតក្រុងវ៉ាស៊ីនតោន សហរដ្ឋអាមេរិក។

ជាមួយគ្នានេះ លោក Namazu ក៏បាននិយាយថ្កោលទោសយ៉ាងខ្លាំង ចំពោះកូរ៉េខាងជើង ដែលមិនអើពើនឹងសេចក្ដីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ ហើយលោកបានជំរុញឲ្យក្រុងព្យុងយ៉ាងគោរពតាមកាតព្វកិច្ច ដែលកំណត់ដោយសហគមន៍អន្តរជាតិ៕