គណៈកម្មាធិការការពារអ្នកសារព័ត៌មាន នៅថ្ងៃពុធ (ទី១៨ ខែតុលា) នេះ បានឲ្យដឹងថា យ៉ាងហោចណាស់អ្នកសារព័ត៌មាន ១៧នាក់ ដែលភាគច្រើនជាជនជាតិប៉ាឡេស្ទីន ត្រូវបានសម្លាប់ គិតចាប់តាំងពីក្រុមហាម៉ាស បានវាយប្រហារអ៊ីស្រាអែល ក្នុងខែនេះ ហើយបន្ទាប់ពីអ៊ីស្រាអែល បានបើកការវាយប្រហារសងសឹកតាមអាកាស នៅតំបន់ហ្គាហ្សា។

គណៈកម្មាធិការ បានប្រាប់ថា អ្នកសារព័ត៌មានម្នាក់ ត្រូវបានសម្លាប់ក្នុងការវាយប្រហារតាមអាកាស នៅប្រទេសលីបង់។ យោធាអ៊ីស្រាអែល បានទីភ្នាក់ងារព័ត៌មានប្រាប់ Reuters ថា ខ្លួនកំពុងស៊ើបអង្កេតឧបទ្ទវហេតុនោះ ដែលបានកើតឡើងក្នុងតំបន់ព្រំដែន ដែលក្រុម Hezbollah និងអ៊ីស្រាអែល បានបាញ់តគ្នាទៅវិញទៅមក។

ក្នុងចំណោមអ្នកសារព័ត៌មានទាំង ១៧នាក់ ដែលត្រូវបានបញ្ជាក់ថា ស្លាប់ក្នុងជម្លោះនេះ មាន ១៣នាក់ជាជនជាតិប៉ាឡេស្ទីន ៣នាក់ជាជនជាតិអ៊ីស្រាអែល និងម្នាក់ជាជនជាតិលីបង់។ នេះបើយោងតាមគណៈកម្មាធិការ ដែលត្រូវបានគេស្គាល់ដោយសរសេរអក្សរកាត់ថា CPJ។ ជាមួយគ្នានេះ អ្នកកាសែត ៣នាក់ ត្រូវបានរាយការណ៍ថា បាត់ខ្លួន ឬត្រូវបានចាប់ឃុំខ្លួន ហើយ ៨នាក់ផ្សេងទៀត បានរងរបួស៕