កណ្ដាល ៖ អគ្គនាយកស៊ីម៉ាកកម្ពុជា និងជាប្រធានក្រុមការងារចុះជួយស្រុកលើកដែក ឯកឧត្តម ហេង រតនា បានបន្តក្រើនរំលឹកដល់បងប្អូនប្រជាពលរដ្ឋនៅស្រុកលើកដែកទំាងអស់មិនត្រូវធ្វេសប្រហែស នូវជំងឺកូវីដ ១៩នោះឡើយ ហើយត្រូវអនុវត្តឲ្យបានខ្ជាប់ខ្ជួននូវវិធាន៣ការពារនិង៣កុំ ខណៈជម្ងឺកូវីដ១៩នេះ បានកើតចំពោះបងប្អូននៅស្រុកលើកដែកនេះជិតមួយរយនាក់ហើយនោះ។

 ការក្រើនរំលឹករបស់ឯកឧត្តម ហេង រតនា នេះគឺបានធ្វើឡើង នៅក្នុងពិធីចុះចែកអំណោយដល់ បងប្អូនប្រជាពលរដ្ឋខ្វះខាត ចំនួន៩៨គ្រួសារនិងពលរដ្ឋរងគ្រោះដោយសារបញ្ហាកូវីដ១៩ចំនួន៦៦គ្រូសារ ដោយជាប់ចក្តាឡីស័ក្ត ដែលរស់នៅស្រុកលើកដែក ខេត្តកណ្តាល នាព្រឹកថ្ងៃទី៤ ខែមិថុនា ឆ្នាំ២០២១នេះ។

ឯកឧត្តម បានថ្លែងបន្តថា បងប្អូនទំាងអស់មិនត្រូវធ្វេសប្រហែសនោះឡើយ ការដែលបងប្អូនមួយចំនួនបានឆ្លងនូវជំងឺកូវីដ១៩នាពេលកន្លងមកនេះ ដោយសារតែយើងមិន​បានធ្វើការប្រុងប្រយ័ត្ន និងអនុវត្តទៅតាមការ ណែនាំរបស់ក្រសួងសុខាភិបាល ក៏ដូច​ជាអភិក្រមរបស់រាជរដ្ឋាភិបាល៣ការពារ និង៣កុំឲ្យបានត្រឹមត្រូវនោះ។ យ៉ាងណា ក៏ដោយរាជរដ្ឋាភិបាលកម្ពុជាយើង មិនបានទុកឲ្យបងរងទុក្ខវេទនានោះឡើយ ដោយបានឲ្យកងទ័ពអាវសជូរមុខ ចុះព្យាបាលពួកយើងដល់ទីកន្លែង និងបានយកចិត្ត ព្យាបាលយ៉ាងសកម្មនោះ។

ជាមួយគ្នានោះដែរ ឯកឧត្តម ហេង រតនា ក៏បានប្រាប់ដល់បងប្អូនទាំងអស់ផងដែរថា នាពេលឆាប់ៗខាងមុខនេះបងប្អូនប្រជាពលរដ្ឋនៅខេត្តកណ្តាលទាំងអស់នឹងទទួលបានវ៉ាក់សាំងការពារមេរោគកូវីដ១៩ដូចអ្វីដែលប្រមុខរាជរដ្ឋាភិបាលបានមានប្រសាសន៍នាពេលកន្លងមក ហើយប្រសិនបើយើងបាន ចាក់វ៉ាក់សាំងរួច យើងនឹងមានហានិភ័យទាបក្នុងការឆ្លងនូវមេរោគដ៏ចង្រៃនេះ។ តែទោះជាយ៉ាងនេះក្តី យើងក៏មិនត្រូវធ្វេសប្រហែសនោះដែរ គប្បីត្រូវបន្តអនុវត្តឲ្យបានខ្ជាប់ខ្ជួនរបស់ក្រសួងសុខាភិបាល បើទោះ បីជាយើងទទួលបានវ៉ាក់សំាងការពារមេរោគកូវីដ១៩ក៏ដោយនោះ។

សូមរំលឹកថា អំណោយដែលបានចែកជូនដល់បងប្អូនប្រជាពលរដ្ឋរងផលប៉ះពាល់ដោយសារ មេរោគកូវីដ១៩នេះគឺជាអំណោយរបស់សម្តេចតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុ ជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា។ អំណោយទាំងនោះ មានគ្រឿបឧបភោគបរិភោក សម្ភារៈការពារមេរោគកូវីដ១៩ និងថវិកាមួយចំនួនទៀត៕អត្ថបទ ៖ ចក់