ខ្សែប្រយុទ្ធប្រេស៊ីល និង Al-Hilal, Neymar នឹងត្រូវទទួលការវះកាត់ បន្ទាប់​ពីរងរបួស​ដាច់​សសៃ​ពួរ​ជង្គង់ខាងឆ្វេងអំឡុងការប្រកួតជាមួយក្រុមជម្រើសជាតិប្រេស៊ីល។

កីឡាករវ័យ ៣១ ឆ្នាំរូបនេះត្រូវបានសែងចេញពីទីលាននៅវគ្គទី ១ អំឡុង​ការ​ប្រកួត​ចាញ់​អ៊ុយរូហ្កាយ ២-០ ព្រឹកថ្ងៃពុធម្សិលមិញនៃការប្រកួតជម្រុះបាល់ទាត់ពិភពលោក ២០២៦។

គេមិនទាន់ដឹងច្បាស់នៅឡើយថា Neymar នឹងស​ម្រាក​ព្យាបាល​របួស​របស់​ខ្លួន​រយៈ​ពេល​ប៉ុន្មាន​នៅ​ឡើយ តែតាមការប៉ាន់ស្មានអាចសម្រាកដល់ទៅ ៩ ខែឯណោះ។

កីឡាករដែលស៊ុតបញ្ចូលទីច្រើនជាងគេឱ្យក្រុមជម្រើសជាតិប្រេស៊ីលរូបនេះ បាន​រងរបួស​ជា​ក្នុង​រយៈពេល​ប៉ុន្មានឆ្នាំចុងក្រោយនេះ។

នៅជាមួយ PSG, Neymar មានរបួសកជើងទាំងសងខាងក្នុងរយៈពេល ២ ឆ្នាំចុងក្រោយ និង​របួស​ដែល​ធ្វើឱ្យគេ អវត្តមានពីក្រុមប្រេស៊ីល ២ ដំបូងនៅ World Cup 2022 ឆ្នាំមុនផងដែរ។

កាលពី World Cup 2014 នៅក្នុងទឹកដីប្រេស៊ីល Neymar មាន​របួស​បាក់​ឆ្អឹង​ខ្នង​នៅ​ពេល​ត្រូវ​មួយ​ជង្គង់​របស់ Juan Zuniga ក្នុងការប្រកួតវគ្គ ៨ ក្រុមចុងក្រោយទល់នឹងកូឡុំប៊ី។

ប្រេស៊ីលឈ្នះការប្រកួតនោះតែ Neymar ត្រូវអវត្តមានការប្រកួតនៅសល់ ខណៈ​ប្រេស៊ីល​ក៏​ចាញ់​អាល្លឺម៉ង់​ធ្ងន់​ក ៧-១ នៅវគ្គពាក់កណ្តាលផ្តាច់ព្រ័ត្រ៕ អត្ថបទ៖នាង សុភាវុធ