ភ្នំពេញ ៖ ឯកឧត្តម អៀង មូលី ទេសរដ្ឋមន្រ្តី ទទួលបន្ទុកដឹកនាំអាជ្ញាធរជាតិប្រយុទ្ធ នឹងជំងឺអេដស៍ បានថ្លែងថា អាជ្ញាធរជាតិប្រយុទ្ធនឹងជំងឺអេដស៍ មានគោលដៅក្នុងការបញ្ចប់ជំងឺអេដស៍នៅឆ្នាំ២០២៥ ដែលជាការប្តេជ្ញាចិត្តរបស់កម្ពុជា ក្នុងការលុបបំបាត់ជំងឺអេដស៍តាមរយៈការកាត់បន្ថយចំនួនអ្នកឆ្លងមេរោគអេដស៍ថ្មីតិចជាងមួយនាក់ក្នុងមួយថ្ងៃ។

ការថ្លែងរបស់ឯកឧត្តម អៀង មូលី ទេសរដ្ឋមន្រ្តី យ៉ាងដូច្នេះ ក្នុងសិក្ខាសាលាពិគ្រោះយោបល់ស្តីពី “ការរៀបចំផែនការយុទ្ធសាស្ត្រជាតិទូលំទំលាយ និងពហុវិស័យឆ្លើយតបនឹងមេរោគអេដស៍ និងជំងឺអេដស៍ លើកទី៦ (២០២៤ - ២០២៨)” នាព្រឹកថ្ងៃទី១៩ ខែតុលា ឆ្នាំ២០២៣នេះ។ សិក្ខាសាលានេះ ចូលរួមពីបណ្តាតំណាងក្រសួង ស្ថាប័នពាក់ព័ន្ធរបស់រាជរដ្ឋាភិបាល តំណាងអង្គការអភិវឌ្ឍន៍ជាតិ អន្តរជាតិ តំណាងសង្គមស៊ីវិល និងតំណាងយុវវ័យ សរុបចំនួន ៨៣រូប។

ឯកឧត្តម អៀង មូលី ទេសរដ្ឋមន្រ្តី បានបន្តថា សិក្ខាសាលានេះ មានគោលបំណង៖ ១) ទទួលបានធាតុចូលបន្ថែម និងយល់ព្រមទៅលើរបាយការណ៍ការពិនិត្យការអនុវត្តផែនការយុទ្ធសាស្ត្រជាតិទូលំទូលាយ និងពហុវិស័យឆ្លើយតបនឹងមេរោគអេដស៍ និងជំងឺអេដស៍ លើកទី៥ (NSP V, 2019-2023)។ ដោយពិនិត្យលើវឌ្ឍនភាពនៃការអនុវត្តលើផែនការយុទ្ធសាស្ត្រជាតិទូលំទូលាយ និងពហុវិស័យឆ្លើយតបនឹងមេរោគអេដស៍ និងជំងឺអេដស៍ លើកទី៥ (២០១៩-២០២៣)។ ទទួលបានធាតុចូលទៅលើសេចក្តីព្រាងផែនការយុទ្ធសាស្ត្រជាតិទូលំទូលាយ និងពហុវិស័យឆ្លើយតបនឹងមេរោគអេដស៍ និងជំងឺអេដស៍លើកទី៦។ សិក្ខាសាលានេះ នឹងផ្តោតលើការអភិវឌ្ឍផែនការយុទ្ធសាស្រ្តជាតិលើកទី៦(NSP VI)។ សិក្ខាសាលាពិគ្រោះយោបល់នេះ នឹងអនុញ្ញាតឱ្យភាគីពាក់ព័ន្ធផ្តល់ធាតុចូលដោយផ្ទាល់ទៅក្នុងធាតុផ្សេងៗ នៃផែនការយុទ្ធសាស្រ្ត រួមទាំងចក្ខុវិស័យ បេសកកម្ម គោលដៅ គោលបំណង និងយុទ្ធសាស្ត្រនៃផែនការយុទ្ធសាស្ត្រជាតិលើកទី៦។ ដោយមានការរួមបញ្ចូលគ្នានូវធាតុចូលពីភាគីពាក់ព័ន្ធ របកគំហើញ និងអនុសាសន៍ នៃការវិភាគស្ថានភាព សេចក្តីព្រាងនៃ NSP VI នឹងត្រូវបានរៀបចំ។

​ក្នុងឱកាសនោះឯកឧត្តមទេសរដ្ឋមន្រ្តី បានផ្តល់នូវអនុសាសន៍ដល់អង្គសិក្ខាសាលា ឱ្យពិនិត្យមើលចំណុចសំខាន់បីគឺ 3Rs ដែលរួមមាន៖ ១) ការពិនិត្យឡើងវិញ, ២) ការថ្លឹងថ្លែងឡើងវិញ, ៣)ការកំណត់ការឆ្លើយតបឡើងវិញ(Recalibrate) ដែលមានន័យដូចខាងក្រោម៖

• ពិនិត្យឡើងវិញ(Review) នូវសមិទ្ធិផលនៃកិច្ចខិតខំប្រឹងប្រែងរួមគ្នារបស់យើង។

• ថ្លឹងថ្លែងឡើងវិញ(Rebalance) អំពីបញ្ហាប្រឈម ឬហានិភ័យ និងឱកាស។

• កំណត់ការឆ្លើយតបឡើងវិញ(Recalibrate) ដោយពិនិត្យមើលយុទ្ធសាស្រដើម្បីពន្លឿនឆ្លើយតបរបស់យើងឱ្យសម្រេចគោលដៅបានឆាប់រហ័ស ដោយកំណត់ឡើងវិញនូវសកម្មភាពអាទិភាពថ្មីៗដែលយើងនឹងត្រូវធ្វើឡើងក្នុងរយៈពេលប្រាំឆ្នាំខាងមុខ។ ចុងបញ្ចប់ ឯកឧត្តមទេសរដ្ឋមន្រ្តី បានមានមតិផ្តាំផ្ញើដល់ក្រុមយុវវ័យទាំងអស់ ពីការចូលរួមលើកទឹកចិត្តដល់ក្រុមប្រជាជនគន្លឹះ ជាពិសេសបានផ្តល់នាមដល់ក្រុមបុរសរួមភេទជាមួយបុរស ថាជា “ក្រុមប្រុសស្អាត” និងប្រកាសបើកសិក្ខាសាលាពិគ្រោះយោបល់៕  អត្ថបទ៖ រដ្ឋា