រដ្ឋមន្ត្រីការបរទេសចិន លោក វ៉ាង យី (Wang Yi) បានប្រាប់សន្និសីទសារព័ត៌មានមួយ កាលពីថ្ងៃពុធ (១៨ តុលា) ថា ប្រទេសចិន បានចុះហត្ថលេខាលើកិច្ចសន្យាអាជីវកម្មមានតម្លៃ ៩៧,២ពាន់លានដុល្លារ ជាមួយបណ្ដាប្រទេសផ្សេងទៀតនៅឯវេទិកាខ្សែក្រវ៉ាត់ និងផ្លូវ ក្នុងសប្តាហ៍នេះ ជាមួយនឹងសមិទ្ធិផលសរុបចំនួន ៤៥៨ករណី។

លោក វ៉ាង ក៏បាននិយាយផងដែរថា ដំណាក់កាលថ្មីនៃគំនិតផ្តួចផ្តើមខ្សែក្រវាត់ និងផ្លូវ នឹងផ្តោតលើការអភិវឌ្ឍន៍បៃតង ក្នុងគោលបំណងធ្វើឱ្យវាមានភាពខុសប្លែកសម្រាប់គម្រោងដ៏ធំនេះ។

អ្នកតំណាងមកពីជាង ១៣០ប្រទេស ដែលភាគច្រើនមកពីក្រុមប្រទេសកំពុងអភិវឌ្ឍន៍សកលខាងត្បូង បានចូលរួមក្នុងវេទិកានេះ រួមទាំងប្រមុខរដ្ឋមួយចំនួនផងដែរ។ មេដឹកនាំដែលលេចធ្លោជាងគេ គឺប្រធានាធិបតីរុស្ស៊ី លោក វ្ល៉ាឌីមៀ ពូទីន ដែលប្រធានាធិបតីចិន ស៊ី ជីនពីង ហៅលោកថាជា «មិត្តសម្លាញ់» របស់ខ្លួន។

ក្នុងពិធីបើកសម្ពោធនាពេលព្រឹក លោក ស៊ី ក៏បានកោតសរសើរចំពោះផែនការដ៏ធំរបស់ខ្លួន គឺគំនិតផ្តួចផ្តើមខ្សែក្រវាត់ និងផ្លូវ (BRI) ដែលបានចាប់ផ្តើមកាលពី ១០ឆ្នាំមុន ដើម្បីកសាងហេដ្ឋារចនាសម្ព័ន្ធ និងបណ្តាញថាមពលសកល ដែលតភ្ជាប់ទ្វីបអាស៊ីជាមួយទ្វីបអាហ្រ្វិក និងទ្វីបអឺរ៉ុប តាមរយៈផ្លូវគោក និងផ្លូវសមុទ្រ ដោយបញ្ជាក់ថា «ប្លង់មេបានប្រែក្លាយទៅជាគម្រោងពិតប្រាកដហើយ»៕