បេសកជនចិនកាលពីថ្ងៃពុធ (១៨ តុលា) បានអំពាវនាវឱ្យមានបទឈប់បាញ់ជាបន្ទាន់ និងទូលំទូលាយរវាងប៉ាឡេស្ទីន និងអ៊ីស្រាអែល ហើយបានជំរុញឱ្យសមាជិកក្រុមប្រឹក្សាសន្តិសុខអង្គការសហប្រជាជាតិ ប្រឈមមុខនឹងការទទួលខុសត្រូវរបស់ពួកគេ នៅក្នុងកិច្ចប្រជុំក្រុមប្រឹក្សាសន្តិសុខស្តីពីជម្លោះប៉ាឡេស្ទីន-អ៊ីស្រាអែល នៅទីស្នាក់ការអង្គការសហប្រជាជាតិ នៅទីក្រុងញូវយ៉ក សហរដ្ឋអាមេរិក។

លោក ចាង ជុន (Zhang Jun) អ្នកតំណាងអចិន្ត្រៃយ៍របស់ប្រទេសចិន ប្រចាំនៅអង្គការសហប្រជាជាតិ បាននិយាយនៅក្នុងកិច្ចប្រជុំនោះថា ប្រទេសចិនថ្កោលទោសយ៉ាងខ្លាំងចំពោះ «ការវាយប្រហារដ៏ឃោរឃៅ» លើមន្ទីរពេទ្យ អាល់ អាលី (Al-Ahli) ក្នុងតំបន់ហ្កាហ្សា ដែលបានឆក់យកជីវិតជនស៊ីវិលស្លូតត្រង់រាប់រយនាក់។

លោកបានសង្កត់ធ្ងន់ថា ការការពារជនស៊ីវិលក្នុងជម្លោះប្រដាប់អាវុធ គឺជាខ្សែបន្ទាត់ក្រហមក្រោមច្បាប់មនុស្សធម៌អន្តរជាតិ ហើយជនស៊ីវិល និងមូលដ្ឋានស៊ីវិល ដូចជាមន្ទីរពេទ្យ និងសាលារៀន មិនគួរ និងមិនត្រូវជាគោលដៅក្នុងប្រតិបត្តិការយោធាឡើយ៕