សារព័ត៌មានក្នុងស្រុក បានរាយការណ៍ថា កាលពីថ្ងៃពុធម្សិលមិញ ស្ថានទូតសហរដ្ឋអាមេរិក និងស្ថានទូតអ៊ីស្រាអែលនៅក្នុងប្រទេសអាហ្សង់ទីន ត្រូវបានជម្លៀសខ្លួនមនុស្ស បន្ទាប់ពីការគំរាមកំហែងដោយគ្រាប់បែក ដែលទទួលបានតាមរយៈអ៊ីម៉ែល រួមទាំងសារសរសេរថា “ជនជាតិជ្វីហ្វ ពួកយើងនឹងទៅសម្លាប់ពួកអ្នកឯងទាំងអស់គ្នា” ។

ក្រុមប្រឆាំងគ្រាប់បែក ត្រូវបានគេរាយការណ៍ថា បាននៅកន្លែងកើតហេតុ ហើយពួកគេបានចូលរួមការហៅទូរស័ព្ទ នៅស្ថានទូតសហរដ្ឋអាមេរិក ជាកន្លែងដែលការគំរាមកំហែងដោយគ្រាប់បែកលើកទី ២ ត្រូវបានធ្វើឡើងតាមអ៊ីម៉ែល ។ ឧទ្ធម្ភាគចក្រ បានល្បាតនៅតំបន់នោះ ហើយក្រុមមន្រ្តី បានបើកការស៊ើបអង្កេតដើម្បីកំណត់ប្រភពដើមនៃការគំរាមកំហែង ។

សារព័ត៌មាន La Nation រាយការណ៍ថា ក្រោយវេលាម៉ោង ១១ព្រឹក ម៉ោងក្នុងស្រុក ក្រុមអាជ្ញាធរ បានបិទប្រតិបត្តិការស៊ើបអង្កេតរបស់ពួកគេ នៅស្ថានទូតទាំង ២ ដោយសារវាគ្រាន់តែជាការគំរាមកំហែងមិនពិតប្រាកដប៉ុណ្ណោះ ។

ទីភ្នាក់ងារព័ត៌មានរ៉យទ័រ បានរាយការណ៍ថា ស្ថានទូតសហរដ្ឋអាមេរិក បាននិយាយថា ពួកគេបានវិលត្រឡប់មករកប្រតិបត្តិការធម្មតាវិញកាលពីរសៀលថ្ងៃពុធ ។

ការគំរាមកំហែងនេះដែរ បានកើតមាន ស្របពេលដែលសង្រ្គាមកើនឡើងរវាងអ៊ីស្រាអែល និងក្រុមហាម៉ាស់ ហើយនិងស្របពេលដែលប្រធានាធិបតីសហរដ្ឋអាមេរិកលោក Joe Bidenបានធ្វើដំណើរទៅដល់ប្រទេសអ៊ីស្រាអែល ដើម្បីបង្ហាញសាមគ្គីភាពជាមួយនឹងការធ្វើសង្រ្គាមរបស់អ៊ីស្រាអែល ប្រឆាំងនឹងក្រុមជីវពលប៉ាឡេស្ទីន ៕