ប្រព័ន្ធផ្សព្វផ្សាយរដ្ឋ បានរាយការណ៍ថា ប្រធានាធិបតីចិនលោក ស៊ី ជីងពីង (Xi Jinping) នៅថ្ងៃព្រហស្បតិ៍ (ទី១៩ ខែតុលា) នេះ បានប្រាប់នាយករដ្ឋមន្ត្រីអេហ្ស៊ីបថា ទីក្រុងប៉េកាំងសង្ឃឹមថា នឹងធ្វើការជាមួយប្រទេសរបស់លោក ដើម្បីនាំមកនូវ «ស្ថិរភាពបន្ថែមទៀត» ទៅកាន់តំបន់មជ្ឈិមបូព៌ា ខណៈដែលជម្លោះរវាងប្រទេសអ៊ីស្រាអែល និងក្រុមហាម៉ាស បានក្លាយជាស្រមោលដ៏ខ្មៅងងឹតគ្របលើតំបន់នេះ។

យោងទៅតាមទូរទស្សន៍រដ្ឋ CCTV បានឲ្យដឹងថា លោក ស៊ី បានប្រាប់លោក Mostafa Madbouly ក្នុងកិច្ចប្រជុំនៅទីក្រុងប៉េកាំងថា៖ «ប្រទេសចិនមានឆន្ទៈ ក្នុងការបង្កើនកិច្ចសហប្រតិបត្តិការ ជាមួយអេហ្ស៊ីប ក្នុងគោលបំណងបញ្ចូលនូវភាពប្រាកដប្រជា និងស្ថិរភាពបន្ថែមទៀតទៅក្នុងតំបន់ និងពិភពលោក»។

ប្រព័ន្ធផ្សព្វផ្សាយ CCTV បានបន្ថែមថា លោក ស៊ី បានលើកឡើងថា៖ «ប្រទេសចិន និងអេហ្ស៊ីប គឺជាមិត្តដ៏ល្អដែលមានគោលដៅដូចគ្នា និងជឿជាក់គ្នាទៅវិញទៅមក ហើយជាដៃគូល្អ ដែលធ្វើការជាមួយគ្នា ដើម្បីការអភិវឌ្ឍ និងវិបុលភាពរួម។ នាពេលបច្ចុប្បន្ននេះ ស្ថានភាពអន្តរជាតិ និងក្នុងតំបន់ កំពុងមានការប្រែប្រួលយ៉ាងខ្លាំងក្លា និងស្មុគស្មាញ ហើយពិភពលោកកំពុងជួបប្រទះនឹងការផ្លាស់ប្តូរយ៉ាងឆាប់រហ័ស ដែលមិនធ្លាប់បានឃើញអស់រយៈពេលមួយសតវត្សរ៍មកហើយ»។

ទំនាក់ទំនងរវាងប្រទេសចិន និងអេហ្ស៊ីប ចាប់ផ្ដើមកាន់តែប្រសើរឡើង នៅប៉ុន្មានខែថ្មីៗនេះ ដោយទីក្រុងគែរ នៅឆ្នាំក្រោយ នឹងក្លាយជាសមាជិកផ្លូវការរបស់ក្រុម BRICS ដែលជាប្លុកនៃបណ្តាប្រទេសមានសេដ្ឋកិច្ចកំពុងរីកចម្រើន។

ចាប់តាំងពីមានការផ្ទុះឡើងនូវអរិភាព រវាងអ៊ីស្រាអែល និងក្រុមហាម៉ាស ក្នុងខែនេះ ប្រទេសអេហ្ស៊ីបភាគច្រើន បានបិទព្រំដែនរបស់ខ្លួនជាមួយតំបន់ហ្គាហ្សាស្ទ្រីប ជាកន្លែង ដែលស្ថានភាពមនុស្សធម៌កាន់តែជួបនឹងភាពអស់សង្ឃឹម។ ប៉ុន្តែទីក្រុងគែរបាននិយាយ នៅថ្ងៃព្រហស្បតិ៍នេះថា ខ្លួននឹងអនុញ្ញាតឲ្យមានផ្លូវចូល «ជួយសង្គ្រោះ» នៃជំនួយមនុស្សធម៌តាមរយៈការឆ្លងកាត់ព្រំដែន Rafah៕