ប្រធានាធិបតីអ៊ីរ៉ង់លោក Ebrahim Raisi បាននិយាយ កាលពីថ្ងៃពុធ (ទី១៨ ខែតុលា) ថា ការផ្ទុះដែលបានវាយប្រហារមន្ទីរពេទ្យមួយ ក្នុងតំបន់ហ្គាហ្សា កាលពីថ្ងៃអង្គារ (១៧ តុលា) គឺជាការវាយប្រហាររបស់អ៊ីស្រាអែល ដែលបង្ហាញពីការចាប់ផ្តើមនៃការបញ្ចប់នៃ «របបជ្វីហ្វនិយម»។

អំឡុងពេលថ្លែងទៅកាន់ក្រុមបាតុករ ដែលគាំទ្រជនជាតិប៉ាឡេស្ទីន នៅទីក្រុងតេអេរ៉ង់ លោក Raisi ក៏បានចោទប្រកាន់ប្រធានាធិបតីអាមេរិក លោក Joe Biden និងសហរដ្ឋអាមេរិកថា ជា «ដៃគូក្នុងឧក្រិដ្ឋកម្ម» របស់អ៊ីស្រាអែល។

សូមរំលឹកថា បើយោងតាមក្រសួងសុខាភិបាលប៉ាឡេស្ទីន បានឲ្យដឹងថា ការផ្ទុះនៅមន្ទីរពេទ្យ Al-Ahli ក្នុងតំបន់ហ្គាហ្សា កាលពីថ្ងៃអង្គារ (ទី១៧ ខែតុលា) បានសម្លាប់មនុស្សយ៉ាងហោច ៤៧១នាក់ និងបានធ្វើឲ្យមនុស្ស ៣១៤នាក់ផ្សេងទៀតរងរបួស។

ប្រទេសអ៊ីស្រាអែល និងប៉ាឡេស្ទីន បានឆ្លើយដាក់គ្នាទៅវិញទៅមក ចំពោះការផ្ទុះ នៅមន្ទីរពេទ្យនេះ ហើយមិនទាន់មានភាគីខាងណាអះអាងទទួលខុសត្រូវនៅឡើយទេ៕