មន្ទីរបញ្ចកោណ បានប្រកាសថា យោធាអាមេរិក បានស្ទាក់ចាប់យានដ្រូនជាច្រើនគ្រឿង ដែលហោះសំដៅលើកងទ័ពរបស់ខ្លួន ដែលឈរជើងក្នុងប្រទេសអ៊ីរ៉ាក់ កាលពីព្រឹកថ្ងៃពុធ ខណៈដែលមន្ត្រីអាមេរិក កំពុង ប្រុងប្រយ័ត្នខ្ពស់ចំពោះការវាយប្រហារ ដែលអាចកើតមានលើកងកម្លាំងអាមេរិកនៅមជ្ឈិមបូព៌ា ចំពេលមានជម្លោះ កាន់តែខ្លាំងឡើងនោះ។

កងកម្លាំងសហរដ្ឋអាមេរិក «បានការពារប្រឆាំងនឹង» យានដ្រូនចំនួនបីគ្រឿងនៅក្នុងប្រទេសអ៊ីរ៉ាក់ ដែលជាកន្លែងដែលទាហានអាមេរិកចំនួន ២.៥០០នាក់ កំពុងឈរជើង នេះបើយោងតាមសេចក្តីថ្លែងការណ៍មួយពីទីបញ្ជាការកណ្តាលរបស់សហរដ្ឋអាមេរិក។ មន្ត្រីអាមេរិកម្នាក់ដែលត្រូវបានផ្តល់អនាមិកឲ្យ ពិភាក្សាអំពីព័ត៌មានលើសពីសេចក្តីថ្លែងការណ៍ផ្លូវការ បាននិយាយថា យានដ្រូនពីរគ្រឿង គឺនៅភាគខាងលិច ដោយគំរាមកំហែងដល់កងទ័ពនៅឯមូលដ្ឋានទ័ពអាកាស Al Asad និងមួយគ្រឿងទៀត គឺនៅភាគខាងជើងនៃប្រទេសនេះ។

សេចក្តីថ្លែងការណ៍នោះ បានឲ្យដឹងថា នៅប្រទេសអ៊ីរ៉ាក់ភាគខាងលិច យោធាអាមេរិក ចាប់បានយានដ្រូនចំនួនពីរគ្រឿង ដោយបានបំផ្លាញមួយគ្រឿង និងធ្វើឲ្យខូចខាតទីពីរ ដែលបណ្តាលឲ្យមាន «របួសស្រាលដល់កងកម្លាំង នៅក្នុងក្រុមចម្រុះ ដើម្បីកម្ចាត់ក្រុមរដ្ឋឥស្លាម ដែលរួមមានទាំងទាហានអាមេរិក និងដៃគូផងដែរ។ នៅប្រទេសអ៊ីរ៉ាក់ភាគខាងជើង កងកម្លាំងសហរដ្ឋអាមេរិក «បានចូលរួម និងបំផ្លាញ»យានដ្រូនទីបីមួយគ្រឿង ដោយមិនបណ្តាលឲ្យមានរបួស ឬខូចខាតឡើយ។

ឧប្បត្តិហេតុកាលពីថ្ងៃពុធ គឺជាការវាយប្រហារបែបនេះជាលើកដំបូងលើទីតាំងរបស់សហរដ្ឋអាមេរិកនៅក្នុងប្រទេសអ៊ីរ៉ាក់ ក្នុងរយៈពេលមិនដល់៤ខែផងនោះ។ មន្ត្រីរូបនេះ បានបដិសេធមិននិយាយថា នរណាជាអ្នកទទួលខុសត្រូវចំពោះការវាយប្រហារនេះទេ។