អគាររងការបំផ្លិចបំផ្លាញរាបដល់ជើងមេឃនៅតំបន់ហ្គាហ្សា ត្រូវបានគេមើលឃើញចាប់ពីតំបន់ភាគខាងត្បូងប្រទេសអ៊ីស្រាអែល នៅព្រឹកថ្ងៃព្រហស្បតិ៍នេះ ស្របពេលដែលភាពតានតឹងកំពុងឡើងកម្តៅខ្លាំង ហើយនិងការរំពឹងទុកពីការវាយប្រហារតាមជើងគោក កំពុងកើនឡើង ។

អ៊ីស្រាអែល បានកោះហៅទាហានបម្រុងច្រើនបំផុតចំនួន ៣៦ម៉ឺននាក់ ហើយនិងបានទម្លាក់គ្រាប់បែកឥតឈប់ឈរលើតំបន់បិទច្រកហ្គាហ្សា បន្ទាប់ពីការវាយប្រហាររបស់ក្រុមហាម៉ាស់លើតំបន់ភាគខាងត្បូងប្រទេសអ៊ីស្រាអែល កាលពីថ្ងៃទី ៧ ខែតុលាកន្លងទៅ ដោយបានសម្លាប់មនុស្សប្រហែល ១.៤០០នាក់ ក្នុងនោះភាគច្រើននៃពួកគេ គឺជាជនស៊ីវិល ។

ស្ថានភាពសង្រ្គាមនៅតែប្រែប្រួលខ្លាំង ក្រោយការផ្ទុះនៅមន្ទីរពេទ្យ Al-Ahli al-Arabi ក្នុងតំបន់ហ្គាហ្សាកាលពីយប់ថ្ងៃអង្គារ ដែលក្រុមមន្រ្តីប៉ាឡេស្ទីន និយាយថា មនុស្ស ៤៧១នាក់ ត្រូវបានសម្លាប់ ហើយពួកគេបានដាក់ការស្តីបន្ទោសលើអ្វីដែលពួកគេហៅថាជាការវាយប្រហារតាមច្រកអាកាសរបស់អ៊ីស្រាអែល ។

ខណៈពេលនោះដែរ រថក្រោះ និងទាហានអ៊ីស្រាអែល បានឈរជើងនៅតាមព្រំដែនជាមួយប្រទេសលីបង់នៅព្រឹកថ្ងៃព្រសហ្បតិ៍នេះ ខណៈផ្សែងខ្មៅហុយចេញពីអគ្គិភ័យនៅតាមព្រំដែនប្រទេសអ៊ីស្រាអែល ជាកន្លែងដែលរងការវាយប្រហារពីភាគីលីបង់ ។

សូមបញ្ជាក់ថា អ៊ីស្រាអែល បានសន្យាថាធ្វើឲ្យរលាយសាបសូន្យក្រុមជីវពលហាម៉ាស់ ដើម្បីសងសឹកលើការវាយឆ្មក់របស់ក្រុមសកម្មប្រយុទ្ធមួយនេះលើទឹកដីអ៊ីស្រាអែល កាលពីរយៈពេល ១២ថ្ងៃមុន ពេលដែលពួកគេបាញ់សម្លាប់ឥតញញើតដៃលើបុរស ស្រ្តី និងកុមារ ហើយនិងបានចាប់ចំណាប់ថ្នូរទៅកាន់តំបន់ហ្គាហ្សា អំឡុងការវាយប្រហារដ៏អាក្រក់បំផុតមកលើជនស៊ីវិលនៅក្នុងប្រវត្តិសាស្រ្តរបស់អ៊ីស្រាអែល ៕