អ្នកបោះឆ្នោត នៅប្រទេសវ៉េណេហ្ស៊ុយអេឡា នៅថ្ងៃអាទិត្យ (ទី២២ ខែតុលា) នឹងជ្រើសរើសបេក្ខជនរួបរួមគ្នាពីក្នុងចំណោមគូប្រជែង ១០រូប ដើម្បីធ្វើជាតំណាងឲ្យសំឡេងប្រឆាំងរបស់ប្រទេស នៅក្នុងការបោះឆ្នោតប្រធានាធិបតីឆ្នាំ២០២៤ ខណៈដែលគេរំពឹងថា ប្រធានាធិបតី លោក Nicolas Maduro នឹងស្វែងរកការជាប់ឆ្នោតឡើងវិញ។ ការបោះឆ្នោតបឋម គឺជាលើកទី១ ដែលគណបក្សប្រឆាំងរបស់ប្រទេសវ៉េណេហ្ស៊ុយអេឡា ហាក់មានប្រៀប ក្នុងរយៈពេលជាង ១ទសវត្សរ៍។

លោកស្រី Maria Corina Machado ដែលជាបេក្ខជនមានសង្ឃឹមខ្ពស់ជាងគេ ត្រូវបានហាមឃាត់មិនឲ្យកាន់តំណែងរដ្ឋ នៅក្នុងចលនាមួយ ដែលត្រូវបានរិះគន់ដោយក្រុមប្រឆាំង និងសហរដ្ឋអាមេរិកដូចគ្នា ហើយគេមានមន្ទិលសង្ស័យថា តើនឹងមានអ្វីកើតឡើង ប្រសិនបើលោកស្រីឈ្នះការបោះឆ្នោតបឋមនេះ។

បេក្ខជន ២នាក់ផ្សេងទៀត ដែលម្នាក់ជាអតីតបេក្ខជនប្រធានាធិបតី លោក Henrique Capriles និងម្នាក់ជាអតីតសមាជិកសភា លោក Freddy Superlano បានដកបេក្ខភាពរបស់ខ្លួនរួចហើយ ដោយសារតែមានការបដិសេធសិទ្ធិដូចគ្នា។

វិស្វករឧស្សាហកម្ម លោកស្រី Machado វ័យ ៥៦ឆ្នាំ ដែលជាបេក្ខជនរបស់គណបក្ស Vente Venezuela បាននិយាយថា លោកស្រីមានគម្រោងធ្វើឯកជនភាវូបនីយកម្មក្រុមហ៊ុនប្រេងរបស់រដ្ឋ PDVSA ប្រសិនបើលោកស្រីបន្តឈ្នះការបោះឆ្នោតប្រធានាធិបតី នៅឆ្នាំក្រោយ៕