ទីភ្នាក់ងារសារព័ត៌មាន ដែលមានសម្ព័ន្ធជាមួយក្រុមហាម៉ាស បានឲ្យដឹង នៅថ្ងៃព្រហស្បតិ៍ (ទី១៩ ខែតុលា) នេះថា ការវាយប្រហាររបស់អ៊ីស្រាអែល បានសម្លាប់ប្រមុខកងកម្លាំងសន្តិសុខជាតិដឹកនាំដោយក្រុមហាម៉ាស លោក Jehad Mheisen និងសមាជិកគ្រួសាររបស់លោក នៅក្នុងផ្ទះរបស់ពួកគេ។

ក្រសួងសុខាភិបាលតំបន់ហ្គាហ្សា ក្រសួងមហាផ្ទៃ និងការិយាល័យប្រព័ន្ធផ្សព្វផ្សាយរបស់ក្រុមហាម៉ាស បានរាយការណ៍ នៅថ្ងៃព្រហស្បតិ៍នេះថា មានការទម្លាក់គ្រាប់បែកយ៉ាងសន្ធាប់របស់អ៊ីស្រាអែលទៅលើផ្ទះសម្បែង និងផ្លូវថ្នល់ពេញមួយយប់ នៅទូទាំងតំបន់។

ប្រព័ន្ធផ្សព្វផ្សាយរបស់ក្រុមហាម៉ាស បានរាយការណ៍ថា នៅព្រឹកថ្ងៃព្រហស្បតិ៍នេះ យន្តហោះបានទម្លាក់គ្រាប់បែក និងបានបំផ្លាញអគារលំនៅឋានខ្ពស់ៗចំនួន ៣ខ្នង ដែលជាជម្រកសម្រាប់គ្រួសាររាប់រយគ្រួសារ ដោយបង្ខំឲ្យពួកគេភៀសខ្លួនចេញពីទីនោះ។

ការស្លាប់របស់លោក Mheisen បានកើតឡើងបន្ទាប់ពីសមាជិកនៃអគ្គក្រុមប្រឹក្សាយោធា និងជាមេបញ្ជាការកណ្តាលក្នុងកងពលតូច Al-Qassam លោក Ayman Nofal ត្រូវបានសម្លាប់ កាលពីថ្ងៃអង្គារ (ទី១៧ ខែតុលា)។ ក្រុមហាម៉ាស បាននិយាយនៅក្នុងសេចក្តីថ្លែងការណ៍ថា លោក Nofal បានស្លាប់នៅក្នុងការវាយប្រហារតាមអាកាសរបស់អ៊ីស្រាអែល នៅតំបន់ហ្គាហ្សា៕