ភ្នំពេញ÷ លោកជំទាវបណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ បានជួបសន្ទនាការងារជាមួយឯកឧត្តម Martin Vavra(ម៉ាទីន វ៉ាវរ៉ា) ឯកអគ្គរដ្ឋទូតឆែក ប្រចាំព្រះរាជាណាចក្រកម្ពុជា ផ្តោតជាសំខាន់លើវិស័យវប្បធម៌, នាថ្ងៃទី១៩ ខែតុលា ឆ្នាំ២០២៣នេះ នៅទីសី្តការក្រសួង។

ជាកិច្ចចាប់ផ្ដើមឯកឧត្តម Martin Vavra បានសម្តែងនៅការអបអរសាទរ លោកជំទាវ រដ្ឋមន្រ្តីដែលត្រូវបានព្រះមហាក្សត្រនៃព្រះរាជាណាចក្រកម្ពុជា សព្វព្រះរាជហឬទ័យ ប្រោសព្រះរាជទាន តួនាទីជារដ្ឋមន្រ្តី ក្រសួងវប្បធម៌ និងវិចិត្រសិល្បៈ នៃព្រះរាជាណាចក្រកម្ពុជា ក្នុងអាណតិ្តទី៧។ ក្នុងជំនួបពិភាក្សាការងារនេះ ឯកឧត្តម ឯកអគ្គរដ្ឋទូតឆែក បានរំលឹកកាលពីដំបូង ក្រុមការងារផលិតករ ឆែក បានចូលមកដល់កម្ពុជា ដោយបានផលិតជាខ្សែភាពយន្តពីសម័យខ្មែរក្រហម ដែលមានតួអង្គកម្ពុជា និងតួអង្គឆែក បានសម្តែងរួមគ្នាក្នុងខ្សែភាពយន្តនោះ។ ក្នុងជំនួបទ្វេរភាគីនេះ ក៏មានគោលបំណងដើម្បីពិភាក្សាពង្រឹង និងពង្រីកកិច្ចសហប្រតិបត្តិការបន្ថែមទៀតរវាងសាធារណរដ្ឋឆែក និងក្រសួងវប្បធម៌ និងវិចិត្រសិល្បៈនៃព្រះរាជាណាចក្រកម្ពុជា ជាពិសេសទាក់ទងនឹងវិស័យវប្បធម៌ ភាពយន្ត និងសិល្បៈនាពេលខាងមុខ។

ជាការឆ្លើយតបលោកជំទាវ បណ្ឌិតសភាចារ្យ ភឿង សកុណា រីករាយស្វាគមន៍យ៉ាងកក់ក្តៅចំពោះវត្តមានរបស់ឯកឧត្តមឯកអគ្គរដ្ឋទូត Martin Vavra ដែលបានគាំទ្រចំពោះគំនិតផ្តួចផ្តើម ជាពិសេសកម្ពុជា ក៏សូមស្វាគមន៍ចំពោះបណ្តាប្រទេសទាំងអស់ ដែលមានបំណងធ្វើកិច្ចសហប្រតិបតិ្តការលើវិស័យវប្បធម៌គ្រប់ផ្នែក ដូចជា ភាពយន្ត សិល្បៈទស្សនីយភាព របាំ និងជួយបណ្តុះបណ្តាលធនធានមនុស្ស នៅសាកលវិទ្យាល័យភូមិន្ទវិចិត្រសិល្បៈ ក៏ដូចជាសាលាមធ្យមវិចិត្រសិល្បៈ៕អត្ថបទ រដ្ឋា