ប្រធានទីភ្នាក់ងារអង្គការសហប្រជាជាតិ ហ្វីលីប ឡាហ្សារីនី (Philippe Lazzarini) បាន​ប្រាប់​សារ​ព័ត៌មាន BBC ថា តំបន់មជ្ឈិមបូព៌ាគឺស្ថិតនៅលើ មាត់ជ្រោះនៃមហន្តរាយ ដោយ​សារ​តែ​សង្គ្រាម​រវាងអ៊ីស្រាអែល និងក្រុមហាម៉ាស។  

ឧត្ដមស្នងការនៃទីភ្នាក់ងារជំនួយរបស់អង្គការសហប្រជាជាតិ UNRWA បាននិយាយថា អំពើ​ហិង្សា​អាចរីករាលដាលពាសពេញតំបន់។ ហើយ​លោក​បានព្រមានអំពីស្ថានភាពដ៏អាក្រក់​បំផុត​សម្រាប់​ជន​ស៊ីវិលនៅក្នុងតំបន់ហ្កាហ្សា ដោយអំពាវ​នាវ​ម្តង​ទៀត​ឱ្យ​មាន​ច្រក​របៀង​ជំនួយ​មនុស្សធម៌​ចូល​ទៅក្នុងតំបន់នេះ ។   

លោក ឡាហ្សារីនី បាននិយាយថារូបលោកបារម្ភ ថា ពិភពលោកពេល​នេះ​បាត់​បង់​ភាព​មនុស្ស​ធម៌​របស់​ខ្លួន។

នៅក្នុង​បទសម្ភាសន៍ផ្តាច់មុខជាមួយ សារព័ត៌មាន BBC លោក បានអំពាវនាវជាថ្មី ឲ្យមានច្រករបៀងជំនួយមនុស្សធម៌ ដោយនិយាយថា ដាច់ខាត​មិន​ត្រូវ​ឲ្យមា​ន​ការ​រំខាន​ការ​ដឹក​ជញ្ជូន​ជំនួយ ដើម្បីជួយប្រជាជននៅហ្គាហ្សាឡើយ។

ថ្លែងនៅក្នុងទីក្រុង ហ្សេរ៉ុយសាឡឹម ប្រមុខ UNRWA បានថ្កោល​ទោស​ការ​វាយ​ប្រហារ​របស់​ក្រុម​ហាម៉ាស​លើ​អ៊ីស្រាអែល ដោយហៅថាជា ការសម្លាប់រង្គាលដ៏គួរឱ្យរន្ធត់ និងព្រៃផ្សៃ ដែល​បាន​បង្កើត​របួសជាតិ របួសសមូហភាពនៅអ៊ីស្រាអែល។

លោកបានបន្ថែមថា យើងអំពាវនាវដល់អ៊ីស្រាអែល និងអ្នកដែលពាក់ព័ន្ធក្នុងជម្លោះនេះ ឱ្យ​គោរព​ច្បាប់​មនុស្សធម៌អន្តរជាតិ។ គ្មានករណីលើកលែងសម្រាប់នរណាម្នាក់ឡើយ ។ និយាយ​អំពី​វិបត្តិ​មនុស្ស​ធម៌​ដែលកំពុងកើនឡើងនៅក្នុងតំបន់ហ្កាហ្សា លោក ឡាហ្សារីនី បាននិយាយថា ប្រជាជន​ប៉ាឡេស្ទីន ២,២ លាននាក់ ពាក់កណ្តាលនៃពួកគេត្រូវបានជម្លៀសចេញពីលំនៅឋាន រស់នៅ​ខ្វះ​ខាត​អ្វី​ៗគ្រប់យ៉ាង៕