របបយោធានីហ្សេ បាននិយាយកាលពីថ្ងៃព្រហស្បតិ៍ (១៩ តុលា) ថា ខ្លួន​បាន​រារាំង​ការ​ប៉ុនប៉ង​រត់​គេច​របស់ប្រធានាធិបតី ដែលត្រូវបានបណ្តេញចេញពីតំណែង លោក Mohamed Bazoum ដែល​ត្រូវបានចាប់ខ្លួនដោយយោធា ចាប់តាំងពីរដ្ឋប្រហារថ្ងៃទី២៦ ខែកក្កដា មក បើទោះបី​ជា​មាន​ការ​អំពាវនាវជាអន្តរជាតិឱ្យដោះលែងលោកក៏ដោយ។

ក្រុមអាជ្ញាធរបណ្តោះអាសន្នរបស់នីហ្សេ បាននិយាយថា លោក Bazoum និងក្រុម​គ្រួសារ​របស់​លោក​ ដោយមានជំនួយពីអ្នកសមគំនិតក្នុងកងកម្លាំងសន្តិសុខ បានគ្រោង​នឹង​បើក​រថយន្ត​ទៅកា​ន់​ជាយ​ក្រុងនៃរដ្ឋធានី នីញ៉ាមេ (Niamey) ហើយ​នឹង​ជិះ​ឧទ្ធម្ភាគចក្រ​ទៅកា​ន់​ប្រទេសជិ​ត​ខាង​នី​ហ្សេរីយ៉ា​ ដើម្បីគេចខ្លួន។

រដ្ឋប្រហាររបស់នីហ្សេ គឺជារដ្ឋប្រហារមួយក្នុងចំណោមរដ្ឋប្រហារចំនួន៥ ដែល​បាន​វាយ​លុក​តំបន់​កណ្តាល Sahel របស់អាហ្រ្វិកខាងលិច ក្នុងរយៈពេល ៣ឆ្នាំមកនេះ ដោយ​ធ្វើ​ឲ្យតំបន់​ដី​ស្ងួត​ដ៏​ធំ​សម្បើម​នៅភាគខាងត្បូងនៃវាលខ្សាច់សាហារ៉ា ស្ថិតនៅក្រោម​ការ​គ្រប់​គ្រង​របស់​មេ​ដឹក​នាំ​យោធា​។

គណបក្ស និងសមាជិកគ្រួសាររបស់លោក Bazoum និយាយថា លោកមិ​ន​មាន​លទ្ធ​ភាព​ប្រើ​ប្រាស់​ទឹក អគ្គិសនី ឬទំនិញស្រស់ ដែលជំរុញ​ឱ្យ​មាន​ការ​ថ្កោល​ទោស​ពី​អតីត​សម្ព័ន្ធ​មិត្ត​លោក​ខាង​លិច​ជា​ច្រើន​ផងដែរ៕