មន្ទីរបញ្ចកោណបានរាយការណ៍ថា យានដ្រូន និងគ្រាប់រ៉ូកែតជាច្រើន បាន​កំណត់​គោល​ដៅ​លើ​មូល​ដ្ឋាន​ទ័ព ដែលមានទាហានរបស់សហរដ្ឋអាមេរិក និងកងកម្លាំងដទៃទៀត។ កាល​ពី​ល្ងាច​ថ្ងៃ​ព្រហស្បតិ៍​ (១៩ តុលា) មូលដ្ឋានទ័ពអាកាស Ain al-Asad ត្រូវបានកំណត់គោលដៅ ហើយ​ការ​បំផ្ទុះ​ជា​ច្រើនដង ត្រូវបានគេឮចេញពីខាងក្នុងមូលដ្ឋានយោធានោះ។

យោធាអ៊ីរ៉ាក់បាននិយាយថា ខ្លួនបានបិទតំបន់ជុំវិញមូលដ្ឋាននោះ ហើយបាន​ចាប់​ផ្តើម​ប្រតិបត្តិការ​ស្វែងរក។ ប្រភពដដែលបានបន្តថា គេមិនទាន់ច្បាស់ថា តើការវាយប្រហារនេះ បាន​បណ្តាល​ឲ្យ​មានមនុស្សស្លាប់ ឬក៏មានការខូចខាតអ្វីខ្លះនោះទេ។

ការវាយប្រហារ​កាល​ពីថ្ងៃព្រហស្បតិ៍នេះ គឺជាការវាយប្រហារលើកទី៣ក្នុងរយៈពេលតិចជាង ២៤ម៉ោង ប្រឆាំងនឹងមូលដ្ឋានទ័ពអាកាស ដែលមានទាហានអាមេរិក នៅក្នុងប្រទេសអ៊ីរ៉ាក់។

កង​កម្លាំងយោធាអាមេរិក នៅក្នុងប្រទេសអ៊ីរ៉ាក់ ត្រូវបានគេកំណត់គោលដៅកាលពីថ្ងៃពុធ (១៨ តុលា) ក្នុងការវាយប្រហារដោយយានដ្រូនចំនួនពីរដងដាច់ដោយឡែកពីគ្នា ដោយការ​វាយ​ប្រហារ​មួយ​ក្នុងចំណោមនោះ បានបង្ករបួសស្រាលដល់ទាហានមួយចំនួនតូច ទោះបីជា​យោធា​អាមេរិក​អាច​ស្ទាក់ចាប់បានយានដ្រូនប្រដាប់អាវុធនោះក៏ដោយ។

កងកម្លាំង​អាមេរិក ក្នុងប្រទេសស៊ីរី ក៏បានបាញ់ទម្លាក់យានដ្រូនពីរគ្រឿង ដែលបាន​កំណត់​គោលដៅ​លើ​ពួកគេផងដែរ។

សូមបញ្ជាក់ថា សហរដ្ឋអាមេរិក មានកងទ័ពចំនួន ២.៥០០នាក់ នៅក្នុងប្រទេសអ៊ីរ៉ាក់ និង​មាន​កង​ទ័ព ៩០០នាក់ទៀត នៅក្នុងប្រទេសស៊ីរីដែលនៅជិតខាង ក្នុងបេសកកម្មផ្តល់ប្រឹក្សា និងជួយ​កង​កម្លាំងក្នុងតំបន់ ក្នុងការប្រយុទ្ធប្រឆាំងនឹងក្រុមរដ្ឋអ៊ីស្លាម ដែលកាលពីឆ្នាំ២០១៤ បាន​ដណ្តើម​កាន់​កាប់ទឹកដីនៃប្រទេសទាំងពីរនេះ៕