មន្ទីរបញ្ចកោណបាននិយាយថា នាវាកងទ័ពជើងទឹកសហរដ្ឋអាមេរិកនៅសមុទ្រក្រហម កាល​ពី​ថ្ងៃ​ព្រហស្បតិ៍ ទី១៩ ខែតុលា បានបាញ់ទម្លាក់មីស៊ីលនិងយានដ្រូន ដែលបាន​បាញ់​ដោយ​ក្រុម​ឧទ្ទាម​ហ៊ូធី​ដែលគាំទ្រដោយអ៊ីរ៉ង់នៅក្នុងប្រទេសយេម៉ែន ដែលទំនងជាដាក់​គោលដៅ​លើ​អ៊ីស្រាអែល​។

អ្នកនាំពាក្យមន្ទីរបញ្ចកោណ ឧត្តមសេនីយ Pat Ryder បានប្រាប់អ្នកសារព័ត៌មានថា មីស៊ីល​ស៊ីប​គោល​ដៅ​វាយប្រហារលើដីគោកចំនួនបីគ្រាប់ និងយានដ្រូនជាច្រើនគ្រឿង ត្រូវបាន​ស្ទាក់​ចាប់​ដោយ​នាវា​ពិឃាត។ លោកបាននិយាយថា ការវាយប្រហារនេះត្រូវបានបាញ់ដោយកងកម្លាំងក្រុម Huthi នៅក្នុងប្រទេសយេម៉ែន ដែលមានសក្តានុពលដាក់គោលដៅទៅក្នុងប្រទេសអ៊ីស្រាអែល។

នាវា USS Carney កំពុងល្បាតនៅសមុទ្រក្រហម ជាផ្នែកមួយនៃវត្តមានយោធាសហរដ្ឋអាមេរិក ដែល​បានដាក់ពង្រាយកម្លាំងយ៉ាងច្រើន បញ្ជាដោយប្រធានាធិបតីលោក Joe Biden ដើម្បី​រក្សា​ស្ថិរភាព​ ក្នុងពេលមានសង្រ្គាមរវាងអ៊ីស្រាអែល និងក្រុមសកម្មប្រយុទ្ធហាម៉ាស នៅតំបន់​ហ្កាហ្សា​។​​ លោក Ryder បាននិយាយថា មីស៊ីលត្រូវបានបាញ់ចេញពីប្រទេសយេម៉ែន ជា​កន្លែង​ដែល​ក្រុម​ឧទ្ទាម​ហ៊ូធី​គាំទ្រដោយអ៊ីរ៉ង់ កំពុងធ្វើសង្គ្រាម​ជាមួយ​រដ្ឋាភិបាល​ដែល​គាំទ្រ​ដោយ​ក្រុម​ចម្រុះ​ដឹកនាំ​ដោយ​ប្រទេស​អារ៉ាប៊ីសាអូឌីត។

លោក និយាយថា យើងមានសមត្ថភាព​ការពារ​ផល​ប្រយោជន៍​ទូលំ​ទូលាយ​របស់​យើង​នៅ​ក្នុង​តំបន់​ និងទប់ស្កាត់ការកើនឡើងជម្លោះនៅក្នុងតំបន់ និងការ​រីក​ធំកាន់​តែ​ទូលំ​ទូលាយ​នៃ​ជម្លោះ​ដែល​បាន​ចាប់​ផ្តើមដោយការវាយប្រហាររបស់ក្រុមហាម៉ាសទៅលើជនស៊ីវិលអ៊ីស្រាអែល។ លោក Biden បានបញ្ជាឱ្យបង្កើនការដាក់ពង្រាយយុទ្ធោបករណ៍ដែនអាកាស និងកងទ័ពជើងទឹក រួម​មាន​ទាំង​ការបញ្ជូននាវាផ្ទុកយន្តហោះពីរគ្រឿងទៅកាន់តំបន់មជ្ឈិមបូព៌ា ដើម្បី​ការពារ​ប្រឆាំង​សង្រ្គាម​អ៊ីស្រាអែល និងក្រុមហាម៉ាស់ ដែលហៀរចេញទៅតំបន់ដែលងាយផ្ទុះសង្គ្រាម។ កាល​ពី​ថ្ងៃ​អង្គារ មន្ទីរបញ្ចកោណ បានបញ្ជាឲ្យបុគ្គលិកចំនួន ២.០០០ នាក់​ប្រចាំ​ការ​សម្រាប់​ការ​ដាក់​ពង្រាយ​ដ៏​មានសក្តានុពល៕