ក្រោយពីបានស្ដាប់របាយការណ៍របស់អភិបាលខេត្តទាំង ៤ របស់កម្ពុជាក្នុងតំបន់ត្រីកោណ គណៈ​ប្រតិភូ រដ្ឋសភាកម្ពុជា-ឡាវ និងវៀតណាម (CLV) បានចុះទៅ​ពិនិត្យ​ស្ថានីយ៍​ផលិត​ទឹកស្អាត​នៅ​ខេត្តស្ទឹងត្រែងដែលបានចំណាយទុនវិនិយោគ ១៣ លានដុល្លារសហរដ្ឋអាមេរិក ជា​កម្ចី​របស់ធនាគារអភិវឌ្ឍន៍អាស៊ី និងទំនប់វារីអគ្គិសនីសេសាន២ ដែលបាន​ចំណាយ​ទុន​វិនិយោគ​ចិន ៨០០ លានដុល្លារ ក្នុងទម្រង់ BOT ដើម្បីផ្គត់ផ្គង់អគ្គិសនីនៅរាជធានីភ្នំពេញ និង​មួយ​ភាគ​តូច​ទៅ​ខេត្តរតនគីរី។

គណៈប្រតិភូរដ្ឋសភាកម្ពុជាដឹកនាំដោយ ឯកឧត្តម សួស យ៉ារ៉ា ប្រធានគណៈកម្មការកិច្ចការ​បរទេស​សហប្រតិបតិ្តការអន្តរជាតិ ឃោសនាការ និងព័ត៌មាន និងគណៈប្រតិភូរដ្ឋសភា ឡាវ-វៀតណាម បានស្ដាប់របាយការណ៍ និងពិភាក្សាជាមួយអភិបាលខេត្តទាំង ៤ ក្នុងតំបន់​ត្រីកោណ​អភិវឌ្ឍន៍​ជាប់​ព្រំដែនវៀតណាម ក្នុងនោះ​មានខេត្តស្ទឹងត្រែង ខេត្តរតនគិរី ខេត្តមណ្ឌលគិរី និង​ខេត្ត​ក្រចេះ ដែលបានធ្វើឡើងនៅ សណ្ឋាគារអង្គរមាស ខេត្តស្ទឹងត្រែង នាថ្ងៃទី១៩ ខែតុលា ឆ្នាំ​២០២៣។

ឯកឧត្តម សួស យ៉ារ៉ា មានប្រសាសន៍ក្នុងកិច្ចប្រជុំពិភាក្សានេះ អំពី​សារៈសំខាន់​ដែល​គួរ​ពិចារណា​លើ​ការងារស្រាវជ្រាវ និងអភិវឌ្ឍន៍​តំបន់​ត្រី​កោណ​លើ​យន្តការ នៃ​ការ​ទូទាត់​ប្រាក់​ដើម្បី​ជួយ​សម្រួល​ពាណិជ្ជកម្មឆ្លងដែនក្នុងតំបន់ត្រីកោណ លើកទឹក​ចិត្ត​បង្កើត​ផ្សារ​នៅ​តាម​ព្រំដែន​ ដើម្បី​ជំរុញ​ពាណិជ្ជកម្ម ដោយមិនភ្លេចទប់ស្កាត់ឧក្រិដ្ឋកម្មឆ្លងដែនឱ្យបានដាច់ខាត។

ឯកឧត្តម​បន្តថា ចំពោះគម្រោងវិនិយោគចំនួន ២៧ គម្រោងរបស់វៀតណាម នៅខេត្តក្នុង​តំបន់​ត្រី​កោណ​ សព្វថ្ងៃនេះ ដំណើរការបានតែ ១០ គម្រោងប៉ុណ្ណោះ និងគម្រោង​វិនិយោគ​វារី​អគ្គិសនី​សេសា​ន​២ ក្នុងទំហំទឹកប្រាក់ ៨០០ លានដុល្លារ និងគម្រោង​ទឹក​ស្អាត​ដែល​ជា​ជំនួយ​ឥត​សំណង​របស់​ធនាគារ ADB ។

ឯកឧត្តម វ៉ូ ហាយហា ប្រធានគណៈកម្មាធិការកិច្ចការបរទេសវៀតណាម បានឯកភាព​នឹង​ការ​លើក​ឡើង​របស់ឯកឧត្ដម សួស យ៉ារ៉ា និងបានគូស​បញ្ជាក់​ពី​សារៈ​សំខាន់​ក្នុង​ការ​អភិវឌ្ឍ​មណ្ឌល​សុខភាព​ក្នុង​តំបន់​ត្រីកោណ ព្រមទាំងជួយជំរុញឱ្យមានការអភិវឌ្ឍន៍កាន់តែខ្លាំងឡើង និង​ស្រប​គ្នា​ក្នុង​ប្រទេសទាំងបី។

ចំណែក ឯកឧត្តម Linkham DOUANSAVANH ប្រធានគណៈកម្មការសេដ្ឋកិច្ច បច្ចេកវិទ្យា និង​បរិស្ថាន និងជាប្រធានគណៈប្រតិភូឡាវបានថ្លែងថា ក្នុងដំណើរទស្សនកិច្ចនៅប្រទេសវៀតណាម ឯកឧត្តមសង្កេតឃើញរោងចក្រកែច្នៃផ្លែឈើមានគំរូដ៏ល្អ និងស្តង់ដារអន្តរជាតិ ដែល​នេះ​ជា​គំរូ​មួយ​សម្រា​ប់ធ្វើកិច្ចសហប្រតិបត្តិការជាមួយគ្នារវាងប្រទេសទាំងបី។

ឯកឧត្តម​បន្តថាចំពោះការវិនិយោគពីភាគីវៀតណាម ឯកឧត្តមយល់ឃើញថា ភាគីកម្ពុជា​ក៏​ដូច​ជា​ភាគី​ឡាវ​តែងតែបើចំហ និងជួយសម្រួលលើកិច្ចការងារផ្សេងៗ ដែលសារៈសំខាន់នៃការវិនិយោគ គឺ​លើវិ​ស័យកសិកម្មនៅក្នុងតំបន់ត្រីកោណនេះ៕