មន្ត្រីក្រសួងការបរទេសអាមេរិកម្នាក់ ដែលធ្វើការនៅក្នុងការិយាល័យត្រួតពិនិត្យការផ្ទេរសព្វាវុធ របស់សហរដ្ឋអាមេរិក ទៅកាន់បរទេស បានលាលែងពីតំណែង ក្នុងការតវ៉ាចំពោះ «ការគាំទ្រដោយងងឹតងងុល» របស់រដ្ឋបាលលោកប្រធានាធិបតី ចូ បៃដិន សម្រាប់ប្រទេសអ៊ីស្រាអែល នៅក្នុងជម្លោះដែលកំពុងបន្តជាមួយក្រុមហាម៉ាស។

លោក ចស ផល (Josh Paul) ដែលបានធ្វើការនៅក្នុងការិយាល័យកិច្ចការនយោបាយ-យោធា របស់នាយកដ្ឋាននេះ អស់រយៈពេលជាង ១១ឆ្នាំ បាននិយាយនៅក្នុងលិខិតលាលែងពីតំណែង កាលពីថ្ងៃពុធ (១៨ តុលា) ថា លោកបានសម្រេចចិត្តចាកចេញ ដោយសារតែខ្លួនមិនអាចយល់ស្របជាមួយនឹង «ការបន្ត ពង្រីក និងពន្លឿន នៃការផ្តល់អាវុធដ៍មហន្តរាយដល់អ៊ីស្រាអែល» បាននោះទេ។

ក្រសួងការបរទេស បានបដិសេធមិនធ្វើអត្ថាធិប្បាយលើការលាលែងពីតំណែងរបស់លោក Paul នេះទេ បើយោងតាមរបាយការណ៍ប្រព័ន្ធផ្សព្វផ្សាយរបស់សហរដ្ឋអាមេរិកជាច្រើន ដោយប្រាប់អ្នកដែលព្យាយាមរកការឆ្លើយតបថា ទីភ្នាក់ងារនេះនឹងមិនពិភាក្សាអំពីបញ្ហាបុគ្គលិកនោះទេ។ 

ចាប់តាំងពីការចាប់ផ្តើមនៃជម្លោះបច្ចុប្បន្នមក រដ្ឋបាលរបស់លោក បៃដិន បាននិងកំពុងបញ្ជាក់ឡើងវិញនូវជំហររបស់ខ្លួនថា អ៊ីស្រាអែលមិនត្រឹមតែមានសិទ្ធិប៉ុណ្ណោះទេ ប៉ុន្តែក៏មានកាតព្វកិច្ចការពារខ្លួន និងការពារប្រជាជនរបស់ខ្លួនផងដែរ៕