ភ្នំពេញ៖ អាជ្ញាធរសង្កាត់ព្រែកថ្មី ខណ្ឌច្បារអំពៅ បានចុះអន្តរាគមន៍នាំយកម៉ាស៊ីនបូមទឹកជាច្រើនគ្រឿង ជួយបូមទឹកចេញពីផ្ទះរបស់ប្រជាពលរដ្ឋ និងផ្លូវមួយចំនួន ដែលរងការប៉ះពាល់លិចទឹកដោយសារទឹកភ្លៀងធ្លាក់ជាប់ៗគ្នាប៉ុន្មានថ្ងៃមកនេះ រួមទាំងផ្ដល់អំណោយដល់ពលរដ្ឋរងគ្រោះទាំងអស់នោះ ហើយអាជ្ញាធរកំពុងដាក់សំណើ កសាងនូវហេដ្ឋារចនាសម្ព័ន្ធប្រព័ន្ធលូ ដើម្បីរំដោះទឹក ។

ក្នុងពេលចុះជួយបូមទឹកពីផ្ទះពលរដ្ឋ និងចែកអំណោយ នាថ្ងៃទី២០ ខែតុលា ឆ្នាំ២០២៣ លោកស្រី វ៉ា សុរិន ចៅសង្កាត់ព្រែកថ្មី បានឲ្យដឹងថា ដោយសារប៉ុន្មានថ្ងៃមកនេះ មានភ្លៀងធ្លាក់ច្រើនក្នុងរយៈពេលប៉ុន្មានថ្ងៃមកនេះ ធ្វើឲ្យភូមិ និងផ្លូវមួយចំនួនក្នុងសង្កាត់ មានការលិចលង់ ប៉ុន្តែមិនទាន់ប៉ះពាល់ដល់អាយុជីវិតរបស់ពលរដ្ឋនោះទេ ។

លោកស្រីបានបន្តថា ក្នុងចំណោមភូមិទាំងអស់ គឺភូមិចំពុះក្អែក រងការប៉ះពាល់ធ្ងន់ជាងគេ សរុបជាផ្ទះប្រមាណជាង ៨០ខ្នង ហើយត្រូវបានអាជ្ញាធរនាំយកអំណោយស្បៀងអាហារជាជំនួយរបស់ព្រះចៅអធិការវត្តគល់ទទឹង ទៅចែកជូនបន្ទាន់ ហើយអាជ្ញាធរកំពុងខិតខំ ធ្វើយ៉ាងណា បើមិនមានភ្លៀងធ្លាក់បន្តទេ នឹងបូមរំដោះទឹកពីផ្ទះពលរដ្ឋឲ្យអស់ក្នុងរយៈពេលខ្លី ។ជាមួយគ្នានេះ លោកស្រីចៅសង្កាត់ព្រែកថ្មី បានអំពាវនាវដល់ប្រជាពលរដ្ឋ ក្នុងមូលដ្ឋានដែលកំពុងរងការលិចលង់ សូមមានការប្រុងប្រយ័ត្នចំពោះកូនតូចៗ រួមទាំងខិតខំថែរក្សាសុខភាព និងធ្វើអនាម័យឲ្យបានល្អ និងនៅពេលមានកិច្ចការអ្វីចាំបាច់ ពាក់ព័ន្ធនឹងបញ្ហាអសន្តិសុខ ត្រូវរាយការណ៍មកអាជ្ញាធរ ដើម្បីជួយអន្តរាគមន៍ ឲ្យបានទាន់ពេលវេលា ៕  អត្ថបទ ៖ បាន សុខរិទ្ធិ