មនុស្សរាប់រយនាក់ កំពុងត្រូវបានជម្លៀសចេញពីលំនៅឋានរបស់ពួកគេ ហើយសាលារៀនជាច្រើនត្រូវបានបិទ នៅក្នុងផ្នែកខ្លះនៃដែនដីស្កុតលែន កាលពីថ្ងៃព្រហស្បតិ៍ (១៩ តុលា) ខណៈតំបន់ភាគច្រើននៃអឺរ៉ុបខាងជើង កំពុងទប់ទល់នឹងអាកាសធាតុដ៏អាក្រក់ ដែលមានព្យុះ ភ្លៀងធ្លាក់ខ្លាំង ព្រមទាំងខ្យល់កន្រ្តាក់ពីភាគខាងកើតផងដែរ។

ទីភ្នាក់ងារព្យាករណ៍អាកាសធាតុ របស់ចក្រភពអង់គ្លេស បានចេញការប្រកាសអាសន្នពណ៌ក្រហមដ៏កម្រមួយ ដែលជាការព្រមានអំពីបញ្ហាអាកាសធាតុខ្ពស់បំផុត សម្រាប់ផ្នែកខ្លះនៃដែនដីស្កុតឡែន ដោយព្យាករណ៍ពី «ភ្លៀងធ្លាក់ដ៏ខ្លាំងមិនធ្លាប់មាន» កាលពីថ្ងៃព្រហស្បតិ៍ និងនៅថ្ងៃសុក្រនេះ ដែលត្រូវបានគេរំពឹងថា នឹងបង្កឱ្យមានទឹកជំនន់យ៉ាងទូលំទូលាយ និងអាច «គ្រោះថ្នាក់ដល់អាយុជីវិត ដោយសារទឹកហូរលឿន ឬទឹកជំនន់ដ៏ជ្រៅ»។

ក្រុមអ្នកព្យាករណ៍បាននិយាយថា ព្យុះដែលដាក់ឈ្មោះមន្ត្រីរបស់ចក្រភពអង់គ្លេសថា បាបេត (Babet) អាចនាំមកនូវភ្លៀងធ្លាក់ច្រើនជាងមួយខែ នៅក្នុងតំបន់ដែលរងផលប៉ះពាល់ខ្លាំងបំផុត ក្នុងដែនដីស្កុតឡែន។

នៅក្នុងទីក្រុង Brechin ជិតឆ្នេរសមុទ្រភាគខាងកើតនៃដែនដីស្កុតឡេន ក្រុមមន្ត្រីបានប្រាប់អ្នកស្រុក ប្រហែល ៤០០គ្រួសារ ឱ្យជម្លៀសខ្លួនទៅកាន់មណ្ឌលសម្រាកក្នុងតំបន់៕