កាលបរិច្ឆេទ ថ្ងៃទី៧ ខែតុលា នឹងត្រូវបានកត់ត្រាជារៀងរហូតនៅក្នុងប្រវត្តិសាស្ត្រអ៊ីស្រាអែល ដោយរំលឹកដល់ថ្ងៃដែលខ្មាន់កាំភ្លើងក្រុមហាម៉ាស បានវាយលុកតាមសហគមន៍ភាគខាងត្បូង ដោយបានសម្លាប់មនុស្ស ១.៤០០នាក់ នៅក្នុងការវាយប្រហារដ៏បង្ហូរឈាមបំផុតរបស់ប្រទេសនេះ ចាប់តាំងពីការបង្កើតឡើងក្នុងឆ្នាំ១៩៤៨ មក។

បច្ចុប្បន្ន ជនជាតិអ៊ីស្រាអែលជាច្រើន បានធ្វើការសាក់កាលបរិច្ឆេទនោះលើរាងកាយរបស់ពួកគេ ដើម្បីរំលឹកដល់អ្នកស្លាប់ និងបាត់ខ្លួន ហើយធ្វើជាសាក្សីចំពោះសោកនាដកម្មរួមមួយនេះ។

វិចិត្រករសាក់រូបម្នាក់បាននិយាយថា «មនុស្សមួយចំនួនជ្រើសរើសរូបសាក់ ដែលរំលឹកពួកគេពីលំនៅឋាន ក្រុមគ្រួសាររបស់ពួកគេ ឬមនុស្សដែលត្រូវបានគេចាប់ជំរិត តាមមធ្យោបាយផ្សេងៗគ្នា។ មនុស្សជាច្រើន បានសាក់កាលបរិច្ឆេទ ថ្ងៃទី៧ ខែតុលា ហើយយើងទាំងអស់គ្នាសុទ្ធតែយល់ហើយ ថាវាមានន័យយ៉ាងណា»។

កាលពីថ្ងៃទី៧ ខែតុលា ឆ្នាំនេះ ក្រុមសកម្មប្រយុទ្ធហាម៉ាស ដែលគាំទ្រដោយស៊ីរី លីបង់ និងអ៊ីរ៉ង់ បានបើកការវាយប្រហារយ៉ាងបង្ហូរឈាមទៅលើអ៊ីស្រាអែល ហើយជាការឆ្លើយតប អ៊ីស្រាអែលបានវាយប្រហារបកវិញ។

ការវាយប្រហារទាំងនោះ បានបណ្តាលឱ្យមនុស្សរាប់ពាន់នាក់ស្លាប់ និងរងរបួស ព្រមទាំងមានការខូចខាតដែលមិនអាចរាប់បាន សម្រាប់ភាគីទាំងសងខាងផងដែរ៕