អង្គការសុខភាពពិភពលោក WHO និងអង្គការយូនីសេហ្វ UNICEF បាននិយាយកាលពីថ្ងៃពុធ (១៨ តុលា) ថា ចំនួនគ្រួសារដែលទទួលរងគ្រោះពីភាពអត់ឃ្លាន បានកើនឡើងស្ទើរតែទ្វេដង កាលពីឆ្នាំមុន នៅក្នុងប្រទេសស៊ូដង់ ដែលសង្រ្គាមរវាងក្រុមមេទ័ពក្នុងប្រទេសនេះ បានធ្វើឱ្យស៊ូដង់ធ្លាក់ក្នុងភាពវឹកវរអស់រយៈពេលប្រាំមួយខែ។

ជម្លោះនេះ បានសម្លាប់មនុស្សជាង ៩.០០០នាក់ នេះបើយោងតាមតួលេខ ដែលត្រូវបានគេប៉ាន់ ហើយបានធ្វើឱ្យមនុស្សរាប់លាននាក់ ត្រូវផ្លាស់ទីលំនៅ និងជនភៀសខ្លួន ដែលធ្វើអោយវិបត្តិស្ថានភាពរបស់ប្រទេសកាន់តែអាក្រក់ទៅៗ ដោយប្រជាជនជាងពាក់កណ្តាលត្រូវការជំនួយមនុស្សធម៌ដើម្បីរស់នៅ។

យោងតាមអង្គការសុខភាពពិភពលោក (WHO) និងមូលនិធិកុមាររបស់អង្គការសហប្រជាជាតិ (UNICEF) បាននិយាយក្នុងសេចក្ដីថ្លែងការ៍មួយថា «កុមារជាង ៧០០.០០០នាក់ បានទទួលរងពីកង្វះអាហារូបត្ថម្ភធ្ងន់ធ្ងរ ហើយកុមារ ១០០.០០០នាក់ ត្រូវការការព្យាបាលសង្គ្រោះជីវិត ប្រឆាំងនឹងកង្វះអាហារូបត្ថម្ភស្រួចស្រាវ អមដោយផលវិបាកផ្នែកវេជ្ជសាស្ត្រ»។

គួររម្លឹកផងដែរថា សង្គ្រាមក្នុងប្រទេសស៊ូដង់ បានផ្ទុះឡើងនៅថ្ងៃទី១៥ ខែមេសា រវាងក្រុមកងទ័ពស៊ូដង់ និងក្រុមកងកម្លាំងគាំទ្ររហ័សយោធាប៉ារ៉ា (RSF)។

សេចក្តីថ្លែងការណ៍នោះបានបន្ថែមថា ជាមួយនឹងមនុស្សជាង ៧,១លាននាក់ ដែលបានផ្លាស់ទីលំនៅខាងក្នុងរបស់ប្រទេសនេះ ស៊ូដង់ឥឡូវនេះបានក្លាយជាប្រទេស ដែលមានចំនួនជនភៀសខ្លួនច្រើនបំផុតនៅលើពិភពលោក៕