យោធាអ៊ីស្រាអែលបានពង្រឹងការការពារភាគខាងជើងរបស់ខ្លួន ខណៈដែលភាពតានតឹងជាមួយក្រុមសកម្មប្រយុទ្ធហេសបូឡា កើនឡើងនៅតាមព្រំដែនលីបង់ ជាមួយនឹងការព្រួយបារម្ភកាន់តែខ្លាំងឡើងពីការរាលដាលសង្គ្រាម នៅមជ្ឈិមបូព៌ា។

អ៊ីស្រាអែល និងក្រុមហេសបូឡា ដែលគាំទ្រដោយអ៊ីរ៉ង់ ត្រូវបានជាប់នៅក្នុងការបាញ់ប្រហារគ្នាកាន់តែខ្លាំងឡើង នៅតាមព្រំដែនលីបង់ ចាប់តាំងពីមានការទម្លាក់គ្រាប់បែករបស់អ៊ីស្រាអែលទៅលើតំបន់ហ្គាហ្សា បន្ទាប់ពីការវាយប្រហារបង្ហូរឈាមរបស់ក្រុមហាម៉ាសជិត ២សប្តាហ៍មុន។ ទាំងអ៊ីរ៉ង់ និងក្រុមហេសបូឡា បានព្រមានពីសកម្មភាព «ទុកជាមុន» ប្រសិនបើអ៊ីស្រាអែល បន្តទៅមុខនូវការលុកលុយផ្លូវគោក ដែលត្រូវបានរំពឹងជាជំហាននាពេលបន្ទាប់។

ស្រមពេលជម្លោះមើលទៅហាក់មានសភាពមិនថមថយសោះ នាយករដ្ឋមន្ត្រីអង់គ្លេស លោក Rishi Sunak និងប្រធានាធិបតីអាមេរិក លោក Joe Biden បានធ្វើដំណើរទៅកាន់មជ្ឈិមបូព៌ា ក្នុងរយៈពេលប៉ុន្មានថ្ងៃចុងក្រោយនេះ ដែលជាការបង្កើនកិច្ចខិតខំប្រឹងប្រែងដ៏គួរឲ្យបារម្ភ ដើម្បីជួយទប់ជម្លោះ ដែលកាន់តែរីកធំឡើងនេះ។ ប៉ុន្តែនៅពេលដែលជម្លោះហិង្សានេះ នៅតែបន្តមាន ចក្រភពអង់គ្លេស សហរដ្ឋអាមេរិក និងអាល្លឺម៉ង់ បានចេញការព្រមានអំពីការធ្វើដំណើរ ដោយជំរុញឲ្យពលរដ្ឋរបស់ខ្លួនចាកចេញពីប្រទេសលីបង់ជាបន្ទាន់។

ហើយឥឡូវនេះ អ៊ីស្រាអែលនិយាយថា ខ្លួនបានពង្រឹងតំបន់ការពារភាគខាងជើង ហើយ «ត្រៀមរួចជាស្រេច ដើម្បីឆ្លើយតបទៅនឹងការវាយប្រហារណាមួយ» ពីប្រទេសជិតខាងរបស់ខ្លួន ដោយអ្នកនាំពាក្យយោធាអ៊ីស្រាអែលលោកឧត្តមសេនីយ៍ Marcus Sheff បានប្រាប់សារព័ត៌មាន The Independent ថា៖ «អ៊ីស្រាអែលគ្មានការអត់ឱនជាដាច់ខាត ចំពោះអង្គការគាំទ្រដោយអ៊ីរ៉ង់ ដែលព្យាយាមបង្កភាពតានតឹងដល់ពួកយើង នាពេលនេះ»៕