បេក្ខភាពប្រធានាធិបតីរបស់គណបក្សអភិរក្សនិយម លោកស្រី Patricia Bullrich កាលពីថ្ងៃព្រហស្បតិ៍ (ទី១៩ ខែតុលា) បានធ្វើនូវកិច្ចខិតខំប្រឹងប្រែងចុងក្រោយរបស់លោកស្រី ក្នុងការបញ្ចុះបញ្ចូលអ្នកបោះឆ្នោត ដែលមិនទាន់សម្រេចចិត្ត ដោយចាត់ទុកខ្លួនលោកស្រីថា ជា «អ្នកផ្លាស់ប្តូរពិតប្រាកដ» សម្រាប់ប្រទេសអាហ្សង់ទីន នៅមុនការបោះឆ្នោតថ្ងៃអាទិត្យ (ទី២២ ខែតុលា) នេះ។

ដោយអ្នកបោះឆ្នោត ដែលពោរពេញដោយកំហឹង ប្រឆាំងនឹងស្ថានភាពនយោបាយបច្ចុប្បន្ន អតីតរដ្ឋមន្ត្រីសន្តិសុខវ័យ ៦៧ឆ្នាំរូបនេះ បានយល់ថា លោកស្រីត្រូវប្រឈមជាមួយនឹងភាពមិនច្បាស់លាស់ រវាងប្លុក Peronist ឆ្វេងនិយម ដែលកំពុងកាន់អំណាចដឹកនាំដោយរដ្ឋមន្ត្រីសេដ្ឋកិច្ច លោក Sergio Massa និងបេក្ខជនស្តាំជ្រុលនិយម លោក Javier Milei ដែលបានទទួលបានការគាំទ្រយ៉ាងច្រើនជាងការរំពឹងទុករបស់លោកស្រី។

ឈរអមដោយអតីតប្រធានាធិបតី លោក Mauricio Macri លោកស្រី Bullrich បានជួបជុំជាមួយអ្នកគាំទ្ររាប់សិបនាក់ នៅទីក្រុង Lomas de Zamora ក្នុងខេត្ត Buenos Aires ហើយលោកស្រីបានសន្យាថា នឹងស្តារសេដ្ឋកិច្ចឲ្យប្រសើរឡើងវិញ បន្ទាប់ពីការគ្រប់គ្រងរបស់លោក Massa។

ជាមួយនឹងអតិផរណាប្រចាំឆ្នាំ ១៣៨ភាគរយ ភាពក្រីក្រលើសពី ៤០ភាគរយ និងវិបត្តិសេដ្ឋកិច្ច ដែលកំពុងលេចឡើង លោកស្រី Bullrich ស្នើឲ្យប្រើប្រព័ន្ធរូបិយវត្ថុពីរ ប៉េសូ-ដុល្លារ ឱនភាពសូន្យ បន្ធូរបន្ថយការគ្រប់គ្រងមូលធន ផ្តោតទៅលើការអប់រំ និងមានវិធានការសន្តិសុខដ៏រឹងមាំ៕