ភ្នំពេញ៖ ឯកអគ្គរាជទូតជប៉ុន ប្រចាំនៅកម្ពុជា លោក យូអ៊ីណូ អាតស៊ូស៊ី (Ueno Atsushi) បានថ្លែងថា កងទ័ពជើងគោកស្វ័យការពារជប៉ុន មានគម្រោងមកកម្ពុជានាពេលឆាប់ៗនេះ ដើម្បីអនុវត្តន៍កម្មវិធីគម្រោង ជាមួយកងទ័ពជើងគោកកម្ពុជា លើកិច្ចសហប្រតិបត្តិការទ្វេភាគី នៃកិច្ចការមនុស្សធម៌ និងការសង្រ្គោះ គ្រោះមហន្តរាយជាដើម។

ថ្លែងនៅក្នុងកិច្ចជំនួបជាមួយនាយឧត្តមសេនីយ៍ ទៀ សីហា ឧបនាយករដ្ឋមន្រ្តី រដ្ឋមន្រ្តីក្រសួងការពារជាតិកម្ពុជា នាថ្ងៃទី២០ ខែតុលា ឆ្នាំ២០២៣នេះលោក យូអ៊ីណូ អាតស៊ូស៊ី បានលើកឡើងពីទំនាក់ទំនងកិច្ចសហប្រតិបត្តិការរវាងកងទ័ពជើងគោកប្រទេសកម្ពុជា និងជប៉ុន ដែលក្នុងពេលកន្លងមក នាវាកងទ័ពជើងទឹកនៃកងស្វ័យការពារជប៉ុន បានចូលចតចំនួនពីរលើក កាលពីឆ្នាំមុន និងពីរលើកទៀតនៅឆ្នាំនេះ ដើម្បីធ្វើទស្សនកិច្ចសិក្សាស្វែងយល់ និងដកពិសោធន៍ ជាមួយកងទ័ពជើងទឹកកម្ពុជា នៅកំពង់ផែខេត្តព្រះសីហនុ។

 លោកឯកអគ្គរាជទូតបានឲ្យដឹងទៀតថា ខែក្រោយនេះកងទ័ពជើងគោកស្វ័យការពារជប៉ុន មានគម្រោងមកកម្ពុជា ដើម្បីអនុវត្តកម្មវិធីគម្រោង ជាមួយកងទ័ពជើងគោកកម្ពុជា ដើម្បីពង្រឹងកិច្ចសហប្រតិបត្តិការលើកិច្ចការងារមនុស្សធម៌, ការងារសង្គ្រោះគ្រោះមហន្តរាយ,រវាងកងទ័ពប្រទេសទាំងពីរឲ្យកាន់តែប្រសើរឡើង។ មួយវិញទៀតលោកឯកអគ្គរាជទូត ក៏បានលើកឡើងផងដែរថា នាពេលកន្លងមក លោកសង្កេតឃើញថា កងទ័ពកម្ពុជា-វៀតណាម-នឹងឡាវ បានធ្វើសមយុទ្ធរួមគ្នាលើកិច្ចការមនុស្សធម៌ និងសង្គ្រោះគ្រោះមហន្តរាយបានយ៉ាងល្អ ហើយជប៉ុន ចង់ចូលរួមក្នុងនាមជាអ្នកសង្កេតការណ៍ផងដែរ។

 ថ្លែងនៅក្នុងកិច្ចជំនួបនោះដែរ នាយឧត្តមសេនីយ៍ ទៀ សីហា បានវាយតំលៃខ្ពស់ចំពោះកិច្ចសហប្រតិបត្តិការទំនាក់ទំនងល្អ រវាងកម្ពុជា-ជប៉ុន ដែលកើតមានឡើងតាំងពីយូរលង់ណាស់មកហើយ ហើយជាបន្តបន្ទាប់ប្រទេសយើងទាំងពីរ បានបន្តពង្រឹងពង្រីកឥតឈប់ឈរ ក្នុងការរឹតចំណងសាមគ្គីភាពមិត្តភាព នៃប្រទេសទាំងពីរឲ្យកាន់តែល្អថែមទៀតផងដែរ។

នាយឧត្តមសេនីយ៍ឧបនាយករដ្ឋមន្រ្តី ក៏បានរំលឹកផងដែរថា ជប៉ុនតែងតែនៅជិតប្រជាជនកម្ពុជា ក្នុងការចូលរួមស្វែងរកសន្តិភាព សម្រាប់ប្រទេសកម្ពុជា ការផ្ដល់នូវជំនួយឥតសំណង ដើម្បីជួយអភិវឌ្ឍន៍លើគ្រប់ហេដ្ឋារចនាសម្ព័ន្ធ និងគ្រប់វិស័យរបស់កម្ពុជា ឲ្យរស់ឡើងវិញប្រកបដោយភាពរីកចម្រើនរហូតដល់សព្វថ្ងៃនេះ។

ជាក់ស្តែងសម្រាប់វិស័យការពារជាតិវិញជប៉ុន នៅតែបន្តជួយបណ្ដុះបណ្ដាលជំនាញ កងរក្សាសន្តិភាពដល់កម្ពុជា ដើម្បីមានគ្រប់លទ្ធភាព ចូលរួមជួយជាលក្ខណៈមនុស្សធម៌ ក្នុងក្របខណ្ឌអង្គការសហប្រជាជាតិ ជួយដល់បណ្ដាប្រទេសនៅក្នុងតំបន់និងនៅលើសកលលោកជាដើម។

នៅក្នុងកិច្ចជំនួបនោះដែរនាយឧត្តមសេនីយ៍ ទៀ សីហា ក៏បានស្នើសុំដល់ភាគីជប៉ុនផ្ដល់កិច្ចសហប្រតិបត្តិការបន្ថែមទៀត លើការជួយបណ្ដុះបណ្ដាលផ្នែកបច្ចេកទេស ដល់កម្លាំងកងទ័ពមួកខៀវកម្ពុជា ឲ្យកាន់តែមានគុណភាព និងប្រសិទ្ធភាពបន្ថែមទៀត ក្នុងការចូលរួមប្រតិបត្តិការជួយការងារមនុស្សធម៌ ថែរក្សាសន្តិភាពក្នុងក្របខណ្ឌអង្គការសហប្រជាជាតិ ដល់បណ្ដាប្រទេសនានានៅលើសាកលលោកផងដែរ៕ អត្ថបទ៖ បាន ចក់​