ភ្នំពេញ៖គណៈកម្មការចំពោះកិច្ចការចាក់វ៉ាក់សាងបង្ការជំងឺកូវីដ-១៩បានឱ្យដឹងថា ប្រជាពលរដ្ឋដល់ទៅជាង ២លាន ៧១ម៉ឺននាក់ហើយ បានទទួលការចាក់វ៉ាក់សាំងនៅក្នុងយុទ្ធនាការចាក់វ៉ាក់សាំងទូទាំងប្រទេសជាង ៣ខែកន្លងមកនេះ។
គណៈកម្មការចំពោះកិច្ចការចាក់វ៉ាក់សាំងបង្ការជំងឺកូវីដ-១៩បានឱ្យដឹងបែបនេះនៅក្នុងរបាយការណ៍ប្រចាំថ្ងៃរបស់ខ្លួនទើបចេញនៅយប់នេះ។
របាយការណ៍នោះ បានឱ្យដឹងថា ដំណើរការចាក់វ៉ាក់សាំងជូនប្រជាពលរដ្ឋទូទាំងប្រទេសម្រេចបាន ២៧.១០ភាគរយនៃចំនួនប្រជាពលរដ្ឋ ១០លាននាក់ដែលរាជរដ្ឋាភិបាលកំណត់ចាក់វ៉ាក់សាំងនៅឆ្នាំនេះ។
បើតាមរបាយការណ៍ដដែលនេះ ប្រជាពលរដ្ឋជាង២លាន ១២ម៉ឺននាក់ហើយ បានទទួលវ៉ាក់សាំងទាំងពីរដូសរួចរាល់ហើយ។
យុទ្ធនាការចាក់វ៉ាក់សាំងទូទាំងប្រទេសបានចាប់ផ្ដើមតាំងពីថ្ងៃទី១០ ខែកុម្ភៈ ហើយគិតមកដល់ថ្ងៃនេះ យុទ្ធនាការនេះបានដំណើរការអស់រយៈពេល ១១៥ថ្ងៃហើយ។
ក្នុងរយៈពេលនេះ យុទ្ធនាការចាក់វ៉ាក់សាំងទូទាំងប្រទេស បានទទួលពលរដ្ឋស្ម័គ្រចិត្តចាក់វ៉ាក់សាំងដល់ទៅជាង ២លាន ៧៦ម៉ឺននាក់ ប៉ុន្តែ ប្រជាពលរដ្ឋជាង ៥ម៉ឺននាក់ មិនត្រូវបានអនុញ្ញាតឱ្យចាក់វ៉ាក់សាំងនោះឡើយដោយសារបញ្ហាសុខភាពរបស់ពួកគេ៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
