ស្បៀងអាហារ ថ្នាំពេទ្យ ឧបករណ៍បន្សុតទឹក ផលិតផលអនាម័យ និងភួយ ជាជំនួយដែលកំពុងនៅកកកុញក្នុងតំបន់ Sinai ប្រទេសអេហ្ស៊ីប នៅអាកាសយានដ្ឋាន El Arish ដែលជាការបើកទីតាំងបន្ថែម ដើម្បីដោះស្រាយការដឹកជញ្ជូនជំនួយ។ Rafah គឺជាព្រំដែនឆ្លងកាត់ ចូលទៅកាន់តំបន់ហ្គាហ្សា ដែលប្រទេសអេហ្ស៊ីប បានសន្យាបើកនៅថ្ងៃសុក្រ ទី២០ ខែតុលានេះ មានចម្ងាយប្រមាណជាង២០គីឡូម៉ែត្រទៅកាន់ភាគខាងកើត។ 

ក្នុងដំណើរទស្សនកិច្ចទៅកាន់ទីក្រុងគែរ ប្រមុខអង្គការសហប្រជាជាតិលោក Antonio Guterres បាននិយាយកាលពីថ្ងៃព្រហស្បតិ៍ថា វាចាំបាច់ត្រូវតែមានដំណើរការផ្នែកមនុស្សធម៌ដោយគ្មានការរារាំង និងរហ័ស បន្ទាប់ពីការការព្រមានខ្លាំងៗអំពីផលប៉ះពាល់ នៃការបិទផ្លូវរបស់អ៊ីស្រាអែល។

លោក Guterres បាននិយាយថាច្រកឆ្លងកាត់ តំបន់ Rafah និងអាកាសយានដ្ឋាន El Arish មិនត្រឹមតែសំខាន់ប៉ុណ្ណោះទេ ប៉ុន្តែវាក៏ជាក្តីសង្ឃឹម និងជាជីវិតសម្រាប់ប្រជាជនតំបន់ហ្គាហ្សា។

លោក Ahmed Ali ប្រធានអឌ្ឍចន្ទក្រហមអេហ្ស៊ីប បានប្រាប់សារព័ត៌មាន AFP ថា អង្គការរបស់លោក បានទទួលជំនួយចំនួន២ទី៣យន្តហោះក្នុងមួយថ្ងៃ ជួលដឹកជញ្ជូនដោយ ទីភ្នាក់ងារមនុស្សធម៌ ឬរដ្ឋ ដែលមានបំណងបញ្ជូនស្បៀងអាហារ ទឹក ការផ្គត់ផ្គង់ថ្នាំពេទ្យ ទៅកាន់ពលរដ្ឋប៉ាឡេស្ទីន ២.៤លាននាក់ ក្នុងតំបន់ហ្គាហ្សា។

ប្រទេសអ៊ីស្រាអែល បានដាក់ការបិទផ្លូវដ៏តឹងរ៉ឹង លើតំបន់ហ្គាហ្សារយៈពេល១៦ឆ្នាំមកហើយ និងបានប្រកាសការហ៊ុមព័ទ្ធទាំងស្រុង បន្ទាប់ពីការវាយប្រហាររបស់ក្រុមសកម្មប្រយុទ្ធហាម៉ាស់អ៊ីស្លាមនិយមលើទឹកដីរបស់ខ្លួន កាលពីថ្ងៃទី៧ ខែតុលា បានព្រមព្រៀងអនុញ្ញាតឲ្យជំនួយឆ្លងកាត់។