ថៃ៖ មន្ត្រី​សុខាភិបាល​ថៃ​បាន​អះ​អាង​ថា​ នឹង​គ្មាន​ការ​ពន្យារពេល​ក្នុង​ការ​ចាប់ផ្ដើម​កម្មវិធី​ចាក់​វ៉ាក់សាំង COVID-19 ទ្រង់ទ្រាយ​ធំ​របស់​ប្រទេស​នៅ​ថ្ងៃ​ទី​៧ ខែ​មិថុនា​នោះ​ទេ បន្ទាប់ពី​ក្រុមហ៊ុន AstraZeneca បាន​ដឹកជញ្ជូន​វ៉ាក់សាំង​ចំនួន ១,៨​លាន​ដូ​ស​មកដល់​​ប្រទេស​ថៃ​ក្នុង​សប្ដាហ៍​នេះ​។

​ក្នុង​ពិធី​ប្រគល់​វ៉ាក់សាំង​ជាមួយ​ក្រុមហ៊ុន AstraZeneca ប្រទេស​ថៃ រដ្ឋមន្ត្រី​ក្រសួងសុខាភិបាល ​លោក Anutin Charnvirakul បាន​និយាយ​ថា ​ព័ត៌មានដែល​ថា​ត្រូវ​បាន​ពន្យារពេល​គឺ​មិន​ពិត​នោះ​ទេ​។ វ៉ាក់សាំង​ដែល​ត្រូវ​បាន​ផលិត​នៅ​ប្រទេស​ថៃ ​ដោយ​ក្រុមហ៊ុន Siam Bioscience ជា​ដៃគូ​ក្នុងស្រុករបស់​ក្រុមហ៊ុន AstraZeneca នឹង​ត្រូវ​ចែកចាយ​ក្នុងស្រុក និង​បណ្ដា​ប្រទេស​នៅ​អាស៊ីអាគ្នេយ៍​។​ អ្នកតំណាង​ក្រុមហ៊ុន AstraZeneca បាន​បង្ហាញ​ការ​ព្រួយ​បារម្ភ​ថា ពួកគេ​ផលិត​យឺត​ជាង​កាលបរិច្ឆេទ​ផលិតកម្ម សម្រាប់​ប្រទេស​ថៃ ​និង​នាំចេញ​។ លោក James Teague ប្រធានក្រុមហ៊ុន AstraZeneca Thailand បាន​និយាយ​ថា យើង​កំពុង​ធ្វើ​ការ​ចែកចាយ​វ៉ាក់សាំង​។ យោង​តាម​សេចក្ដីជូនដំណឹង​កាល​ពី​ពេល​ពីមុន​របស់​អាជ្ញាធរ​ថៃ ក្រុមហ៊ុន ​AstraZeneca ត្រូវ​ផ្តល់​ឲ្យ​វ៉ាក់សាំង​ចំនួន ៦លាន​ដូ​ស​មក​ប្រទេស​ថៃ​នៅ​ខែ​មិថុនា និង​ ១០​លាន​ដូ​ស​រៀង​រាល់​ខែចាប់ពី​ខែ​កក្កដា​ដល់​ខែ​វិច្ឆិកា និង ៥​លាន​ដូ​ស​ចុងក្រោយ​ក្នុង​ខែ​ធ្នូ​។

ប៉ុន្តែ​លោក​ Teague ប្រធាន​ក្រុមហ៊ុន AstraZeneca Thailand បាន​បដិសេធ​មិន​បញ្ជាក់ ​នៅ​ពេល​ត្រូវ​បាន​គេ​សួរ​អំពី​កាលបរិច្ឆេទ ​និង​ចំនួន​វ៉ាក់សាំង​ដែល​ត្រូវ​បញ្ជូន​មក​។ រហូតមក​ដល់​ពេលនេះ​តិច​ជាង ៤% នៃ​ប្រជាជន​ប្រមាណ​ ៦៩​លាន​នាក់​របស់​ប្រទេស​ថៃ បាន​ទទួល កម្រិត​វ៉ាក់សាំង​យ៉ាងហោចណាស់​ដូ​ស​ទី​១​។ រដ្ឋាភិបាល​មានបំណង​ប្រមូលប្រជាជន​ប្រមាណ ៧០% នៃ​ចំនួន​ប្រជាជន​ឱ្យ​ចាក់​វ៉ាក់សាំង​បាន​ពេញលេញ​នៅ​ដំណាច់​ឆ្នាំ​នេះ​៕

អត្ថបទ៖ ប៊ុនថន