អគ្គលេខាធិការអង្គការសហប្រជាជាតិ លោក Antonio Guterres បាន​ប្រើប្រាស់​ដំណើរ​ទស្សន​កិច្ច​ទៅ​កាន់​ច្រកឆ្លងកាត់របស់ប្រទេសអេហ្ស៊ីបជាមួយតំបន់ហ្គាហ្សាកាលពីថ្ងៃសុក្រ ដើម្បី​អំពាវ​នាវ​ដោយ​មនោសញ្ចេតនាសុំឲ្យរថយន្តដឹកជំនួយបានចូលទៅក្នុងតំបន់ហ៊ុមព័ទ្ធ ប៉ុន្មាន​ថ្ងៃ​បន្ទាប់​ពី​សហរដ្ឋ​អាមេរិកបានលើកឡើងនូវក្តីសង្ឃឹមនៃការទម្លាយភាពទាល់ច្រកផ្នែកការទូត។ ដោយឈរ​នៅ​លើ​ផ្លូវ​ច្រកឆ្លងកាត់តំបន់ Rafah ក្នុងឧបទ្វីប Sinai ជាកន្លែង​ដែល​រថយន្ត​ដឹក​ជំនួយ​ជាង​ ២០០​គ្រឿង កំពុងរង់ចាំ ហើយ ជំនួយជាច្រើនទៀតបាននៅគរកកកុញ ដែលលោក Guterres បាន​អធិប្បាយអំពីការពន្យាពេលក្នុងការដឹកជញ្ជូនស្បៀងអាហារ ទឹក ឱសថ និងប្រេង​ឥន្ធនៈ​ទៅ​ដ​​ល់​អ្នកដែលត្រូវការជំនួយ ថាជាការខកចិត្ត។ តំបន់ Rafah នៅតែត្រូវបានបិទចាប់តាំងពី ភ្លាមៗ បន្ទាប់​ពីអ៊ីស្រាអែល បានចាប់ផ្តើមទម្លាក់គ្រាប់បែករបស់ខ្លួននៅតំបន់ហ្គាហ្សា ក្នុងការ​សង​សឹក​ចំពោះ​ការ​វាយប្រហាដ៏ឃោរឃៅដោយក្រុមសកម្មប្រយុទ្ធហាម៉ាស់ កាលពីថ្ងៃទី ៧ ខែតុលា ហើយ​ជម្លោះជុំវិញលក្ខខណ្ឌសម្រាប់ការដឹកជញ្ជូនជំនួយ បានរារាំងការបើកតំបន់នេះឡើងវិញ។ លក្ខខណ្ឌជាច្រើន រួមមានការ​ទាមទារ​របស់​អ៊ីស្រាអែល​សម្រាប់​យន្តការ​មួយ​ដើម្បី​ត្រួត​ពិនិត្យ​ជំនួយ​ ខណៈ​បណ្តា​រដ្ឋ​ប្រទេស​លោក​ខាង​លិច​កំពុង​ជំរុញ​ឱ្យ​ជម្លៀស​អ្នក​កាន់​លិខិត​ឆ្លង​ដែន​បរទេស​ចេញ​ពី​តំបន់ហ្គាហ្សា។ បន្ទាប់ពីការធ្វើដំណើរទៅកាន់ប្រទេសអ៊ីស្រាអែលកាលពីថ្ងៃពុធ ប្រធានា​ធិបតីសហរដ្ឋអាមេរិក លោក Joe Biden បាននិយាយថា កិច្ចព្រមព្រៀង​ត្រូវ​បា​ន​ឈាន​ដល់​សម្រាប់​រថយន្តដឹកជំនួយចំនួន ២០ ដើម្បីឆ្លងកាត់តំបន់ Rafah ហើយកាលពីថ្ងៃសុក្រ លោក​បាននិយាយថា លោកជឿថារថយន្តដឹកជំនួយដំបូងទាំងនោះនឹងឆ្លងកាត់ក្នុងរយៈពេល ៤៨ ម៉ោងទៀត។ មន្ត្រីអង្គការសហប្រជាជាតិ និយាយថា យ៉ាងហោចណាស់រថយន្តជំនួយចំនួន ១០០ គ្រឿងក្នុងមួយថ្ងៃគឺត្រូវការជាចាំបាច់ដើម្បីគ្របដណ្តប់លើតម្រូវការបន្ទាន់ ហើយ​ប្រតិបត្តិការ​ជំនួយណាមួយត្រូវតែមាននិរន្តរភាពទំហំ។ ភាគច្រើននៃប្រជាជន ២,៣ លាន​នាក់​នៅ​ក្នុង​ហ្គាហ្សា ពឹងផ្អែកលើជំនួយមនុស្សធម៌។ តំបន់ហ៊ុនព័ទ្ធឆ្នេរមួយនេះ ស្ថិតនៅ​ក្រោម​ការ​បិទ​ផ្លូវ​រប​ស់អ៊ីស្រាអែលនិងអេហ្ស៊ីប ចាប់តាំងពីក្រុមហាម៉ាស បានចូលគ្រប់គ្រងតំបន់នេះនៅឆ្នាំ ២០០៧​៕