វរសេនីយ៍ឯក Mamane Sani Kaiou របស់ប្រទេសនីហ្សេ បាននិយាយកាលពីថ្ងៃសុក្រថា ក្បួន​រថយន្ត​យោធាបារាំង នឹងចាកចេញពីប្រទេសនីហ្សេ ទៅកាន់ប្រទេសឆាដ ក្នុងប៉ុន្មានថ្ងៃ​ខាង​មុខ​នេះ ដែលបានបង្ហាញថាជាចំណុចពាក់កណ្តាលផ្លូវនៃការដកកងទ័ពបារាំងចំនួន ១.៤៥០នាក់ មាន​មូលដ្ឋាននៅប្រទេសអាហ្វ្រិកខាងលិចមួយនេះ។

កាលពី​សប្តាហ៍មុន ក្បួនរថយន្តយោធាបារាំង បានចាប់ផ្តើម​ចាក​ចេញ​ពី​មូលដ្ឋាន​នៅ​ប្រទេស​នីហ្សេ ភាគនិរតី ជាការចាប់ផ្តើមចាកចេញជាការទាមទារដោយរបបយោធាប្រទេសនីហ្សេ ដែល​បង្ក​ផល​ប៉ះពាល់បន្ថែមទៀតដល់ឥទ្ធិពលរបស់ប្រទេសបារាំងនៅក្នុងតំបន់ Sahel រងគ្រោះ​ដោយ​ជម្លោះ​របស់អាហ្វ្រិកខាងលិចមួយនេះ។

ឧត្តមសេនីយ៍បារាំងម្នាក់ លោក Eric Ozanne បាននិយាយថា ក្បួនរថយន្ត​ដែល​បាន​ចាក​ចេញ​កាល​ពី​សប្តាហ៍មុន បានទៅដល់រដ្ឋធានី អិន ដ្យាមេណា (N'Djamena) របស់ប្រទេសឆាដ ហើយ​ការ​ធ្វើដំណើរបានប្រព្រឹត្តទៅយ៉ាងរលូន។

បន្ទាប់ពី​មានសម្ពាធជាច្រើនសប្តាហ៍ពីមន្ត្រីយោធា ដែលបានដណ្តើមអំណាចកាលពីខែកក្កដា ប្រទេស​បារាំង កាលពីខែមុនបានព្រមព្រៀងដកកងទ័ពរបស់ខ្លួនមានមូលដ្ឋាននៅប្រទេសនីហ្សេ នៅ​ត្រឹមចុងឆ្នាំនេះ ជាការបែក​បាក់​យ៉ាង​ច្បាស់​លាស់​ក្នុង​ទំនាក់​ទំនង​យោធា​ជាមួយ​អតីត​អាណានិគម​របស់ខ្លួន ក្នុងពេលមានការឆ្លើយតបប្រឆាំងបារាំងក្នុងតំបន់នេះជាបន្តបន្ទាប់។

លោក Ozanne បាននិយាយថា ការដកកងទ័ពទៅតាមផ្លូវឆ្លងកាត់ប្រទេសឆាដ នឹងមិន​មាន​សេស​សល់​នៅ​ទី​នោះទេ ហើយគោលដៅនៅតែត្រូវបញ្ចប់ការដកកងទ័ពចេញពីប្រទេសនីហ្សេ នៅ​ត្រឹមថ្ងៃទី ៣១ ខែធ្នូ៕