អ៊ីស្រាអែលបាននិយាយកាលពីថ្ងៃសុក្រថា ខ្លួននឹងជម្លៀសពលរដ្ឋជាង ២០.០០០នាក់ ចេញ​ពី​ទីក្រុង Kiryat Shmona ជាទីក្រុង​ធំ​បំផុត​មួយ​នៅ​ព្រំដែន​ភាគ​ខាង​ជើង​របស់​ខ្លួន​ជា​មួយ​ប្រទេស​លីបង់​ បន្ទាប់ពីមានការបាញ់ប្រហារឆ្លងព្រំដែនយ៉ាងខ្លាំងនៅក្នុងតំបន់នេះ។

ព្រំដែន​អ៊ីស្រាអែល-លីបង់ ត្រូវបានគេមើលឃើញថាមានការប៉ះទង្គិចគ្នាញឹកញាប់ ចាប់តាំង​ពី​សង្គ្រាម​នៅ​តំបន់ហ្គាហ្សាបានផ្ទុះឡើងកាលពី ពីរសប្តាហ៍មុន។

អ៊ីស្រាអែល​ បានប្រកាសរួចហើយនូវតំបន់មួយចំនួននៅតាមបណ្តោយព្រំដែន ជាតំបន់យោ​ធា​បិទ​ទ្វារ​ ដោយបង្ខំឱ្យពលរដ្ឋត្រូវភៀសខ្លួនចេញ ប៉ុន្តែនេះ​គឺ​ជាការ​ជម្លៀស​ទ្រង់​ទ្រាយ​ធំ​បំផុត​ចេញ​ពី​តំបន់​ភ្នំ នៅតំបន់ Galilee ភាគខាងកើត។

លោក Daniel Hagari អ្នកនាំពាក្យកងកម្លាំងការពារជាតិអ៊ីស្រាអែល (IDF) បាននិយាយថា ការ​ជម្លៀសបែបនេះ បានធ្វើឡើងរួចហើយនៅក្នុងទីក្រុងមួយចំនួននៅព្រំដែនភាគខាងជើង ដែល​អនុញ្ញាត​ឱ្យកម្លាំង IDF ពង្រីកសេរីភាពប្រតិបត្តិការរបស់ខ្លួន ដើម្បីធ្វើសកម្មភាព​ប្រឆាំ​ង​អង្គការ​ភេរវកម្ម​ក្រុម Hezbollah ។

អំពើហឹង្សាជាប្រចាំនៅតាមព្រំដែនអ៊ីស្រាអែល-លីបង់ បានបង្កើនការព្រួយបារម្ភថា ការប្រយុទ្ធ​គ្នា​រវាង​អ៊ីស្រាអែល និងក្រុមអ៊ីស្លាមនិយមហាម៉ាស នៅតំបន់ហ្គាហ្សា អាចឈាន​ដល់​ជម្លោះ​ក្នុង​តំបន់​កាន់​តែទូលំទូលាយ។

យោធាអ៊ីស្រាអែល បាននិយាយថា យានដ្រូនមួយគ្រឿងរបស់ខ្លួន បានវាយប្រហារ​ភេរវករ​ម្នាក់​នៅ​ក្នុង​ទឹក​ដី​លីបង់កាលពីពេលយប់ ហើយយោធា​បាន​កំណត់​គោល​ដៅ​ទៅ​លើ​យុទ្ធោ​បករណ៍​របស់​ក្រុម​ Hezbollah ក្នុងការឆ្លើយ​តប​ទៅ​នឹង​គ្រាប់​រ៉ុក្កែត​ដែល​ត្រូវ​បាន​បាញ់​ចេញ​ពី​ប្រទេស​លី​បង់​៕