កោះកុង៖ លោកជំទាវ មិថុនា ភូថង អភិបាលខេត្តកោះកុង បានជំរុញ​ដល់​មហាជន​ពាក់ព័ន្ធ​ចូលរួម​លើ​កស្ទួយស្រឡាញ់អក្សរសិល្ប៍ខ្មែរ តាមរយៈការអាន និងជាវសៀវភៅ។

លោក​ជំទាវអភិបាលខេត្តកោះកុង បានបង្ហាញ​ការ​ពេញចិត្ត​យ៉ាងខ្លាំង​ចំពោះ​ការ​រៀបចំ​ជា​មហោ​ស្រព​អក្សរសិល្ប៍ខ្មែរក្នុងខេត្ត ក្នុងគោលបំណង​ ដើម្បី​ចូលរួម​ចំណែក​ការ​បណ្តុះ​ស្មារតី​ស្រឡាញ់​អក្សរ​សិល្ប៍ខ្មែរ លើកកម្ពស់កិត្តិយស និងគុណតម្លៃរបស់អ្នកនិពន្ធ និងការ​បង្កើន​ឱកាស​ក្នុង​ការ​ទំនាក់​ទំនង ក៏ដូចជាពង្រីកវិសាលភាពទីផ្សារដល់អ្នកនិពន្ធចំពោះវិស័យបោះពុម្ពជាដើម។

លោក​ជំទាវ មិថុនា ភូថង បន្តបំផុសស្មារតីដល់មហាជន និងយុវជននៅក្នុងខេត្តកោះកុង ចូល​រួម​ស្រឡាញ់​ និងអានសៀវភៅឱ្យបានកាន់តែច្រើន គ្រាមាន​កិច្ច​ខិតខំ​ប្រឹង​ប្រែង​របស់​ក្រុម​ការងារ​មហោ​ស្រព​អក្សរសិល្ប៍ខ្មែរ ព្រមទាំងបណ្តាអង្គ​ភាព​ពាក់​ព័ន្ធ​នានា​ដែល​ខិតខំ​បំពេញ​ការងារ​លើ​វិស័យ​អក្សរសិល្ប៍ខ្មែរ និងតែងតែអនុវត្តការងារប្រកបដោយ ស្មារតីទទួលខុសត្រូវខ្ពស់ យកចិត្ត​ទុក​ដាក់​ចូលរួមអភិវឌ្ឍន៍ ថែរក្សាលើកស្ទួយ និងផ្សព្វផ្សាយអក្សរសិល្ប៍ជាតិ។

ក្នុង​ពិធីមហោស្រពអក្សរសិល្ប៍ខ្មែរ លើកទី៦ ប្រធានបទ “សំឡេងចម្រុះពណ៌ Invisible Voice" នៅថ្ងៃ​ទី​២១ ខែតុលា ឆ្នាំ២០២៣ លោកជំទាវអភិបាលខេត្តស្រ្តីទី១កម្ពុជា រំពឹងទុកជាមុនថា ពលរដ្ឋ និងយុវជន ក្មេងៗ​ជំនាន់​នឹងទទួលបានចំណេះដឹងកាន់តែច្រើនអំពី អក្សរសិល្ប៍ខ្មែរ បន្ទាប់​ពី​មហោស្រពនេះត្រូវបានបញ្ចប់ដោយជោគជ័យ តាមរយៈចូលរួមពីភាគីពាក់ព័ន្ធទាំងអស់។

លោកស្រី សូ  ភីណា ជាស្ថាបនិក និងជាប្រធានក្រុមរៀបចំមហោស្រពអក្សរសិល្បិ៍ខ្មែរ អះ​អាង​ថា ​មហោស្រពអក្សរសិល្បិ៍ខ្មែរនេះ នឹងបង្ហាត់បង្ហាញ ចែករំលែកបទពិសោធន៍ពីអ្នកនិពន្ធ និង​អ្នក​ប្រែ​អក្សរសិល្ប៍នានា ដើម្បីចែក​រំលែក​ចំណេះ​ដឹង​ពាក់ព័ន្ធ​នឹង​ការ​បក​ប្រែ​អក្សរ​សិល្ប៍​នៅ​ប្រទេស​យើង ​និងជំរុញឱ្យមានភាពសំបូរបែបក្នុងវិស័យអក្សរសិល្ប៍ជាតិយើងផងដែរ៕  អត្តបទ ឈឹម មករា