ក្រុមហ៊ុនផលិតស្រាបៀរដ៏ធំបំផុតមួយរបស់ប្រទេសចិន បានឲ្យដឹងថា ខ្លួន​បាន​បើកការ​ស៊ើប​អង្កេត​មួយ បន្ទាប់ពីវីដេអូ ដែលបង្ហាញឲ្យឃើញពីបុគ្គលិករោងចក្រ កំពុងបន្ទោបង់ទឹកមូត្រ (ម៉ូត)​ លើគ្រឿងផ្សំដើម ត្រូវបានចែករំលែកតៗគ្នាយ៉ាងឆាប់រហ័ស នៅសប្តាហ៍នេះ។

ឃ្លីប​វីដេអូ ដែលត្រូវបានផ្សព្វផ្សាយ កាលពីថ្ងៃព្រហស្បតិ៍ (ទី១៩ ខែតុលា) ត្រូវ​បាន​អះអាង​បង្ហាញ​​ពីកម្មករបុរស នៅឃ្លាំងស្តុករបស់ក្រុមហ៊ុនផលិតស្រាបៀរ Tsingtao បាន​តោងឡើ​ង​ចូល​ទៅក្នុង​កុងតឺន័រ ដែលមានជញ្ជាំងខ្ពស់ រួចបត់ជើងតូចដាក់វត្ថុធាតុនៅក្នុងនោះ។

វីដេអូនេះត្រូវបានគេចែកចាយយ៉ាងទូលំទូលាយ នៅលើបណ្តាញសង្គមរបស់ប្រទេសចិន ដោយ​មាន​អ្នក​ចូលមើលរាប់សិបលាននាក់ នៅលើវេទិកាដ៏ពេញនិយម Weibo។ ក្រុមហ៊ុនស្រាបៀរ Tsingtao​ បាននិយាយកាលពីថ្ងៃសុក្រថា ខ្លួនបានទាក់ទងទៅនគរបាលហើយ ពាក់ព័ន្ធ​នឹង​ឧប្បត្តិ​ហេតុ​នេះ ហើយការស៊ើបអង្កេតកំពុងបន្តធ្វើ។

Tsingtao ដែលជាផលិតផលស្រាបៀរធំជាងគេទី២ របស់ប្រទេសចិន គឺជាម៉ាកភេសជ្ជៈ​ដ៏​ល្បីមួ​យ​របស់​ប្រទេស ហើយស្រាបៀរដបវែងរបស់ក្រុមហ៊ុននេះ គឺជាអ្វី ដែលខ្វះមិនបាន សម្រាប់បារ និង​ភោជនីយដ្ឋានានា នៅទូទាំងអាស៊ីបូព៌ា៕