កូរ៉េខាងជើង នៅថ្ងៃសៅរ៍ (ទី២១ ខែតុលា) បានថ្កោលទោសសហរដ្ឋអាមេរិក ចំពោះ​ការ​ផ្គត់ផ្គង់​ឲ្យ​ប្រទេសអ៊ុយក្រែននូវមីស៊ីលផ្លោងរយៈចម្ងាយឆ្ងាយ ដែលគេស្គាល់ថា ATACMS (ប្រព័ន្ធ​មីស៊ីល​តាកទិចកងទ័ព) ដោយនិយាយថា ការវាយប្រហារណាមួយលើរុស្ស៊ីជាមួយនឹងមីស៊ីលនេះ នឹង​រារាំង​ដល់កិច្ចខិតខំប្រឹងប្រែងដើម្បីឲ្យមានសន្តិភាព។

កាល​ពីថ្ងៃអង្គារ អ៊ុយក្រែនបានប្រាប់ថា ខ្លួន​បាន​ប្រើប្រាស់​ជា​លើក​ដំបូង​នូវ​ប្រព័ន្ធ​មីស៊ីល​តាក​ទិច​កង​ទ័ព (ATACMS) ដែលផ្គត់ផ្គង់ដោយសហរដ្ឋអាមេរិក ដោយ​បាន​ធ្វើ​ខូច​ខាត​យ៉ាង​ធ្ងន់ធ្ងរ​លើ​អាកាស​យានដ្ឋានចំនួន២ នៅតំបន់ដែលកាន់កាប់ដោយរុស្ស៊ី។ បន្ទាប់ពីកងកម្លាំងរុស្ស៊ីបានលុកលុយអ៊ុយក្រែន ក្នុងខែកុម្ភៈ ឆ្នាំ២០២២ រដ្ឋាភិបាលក្រុងគីវ បាន​ស្នើ​សុំម្តង​ហើយម្តងទៀតពីទីក្រុងវ៉ាស៊ីនតោនឲ្យជួយផ្ដល់នូវគ្រាប់មីស៊ីល ខណៈដែលសន្យាថា នឹង​មិន​ប្រើប្រាស់មីស៊ីលទាំងនោះនៅក្នុងប្រទេសរុស្ស៊ីទេ។

ក្នុងសេចក្តីថ្លែងការណ៍ ដែលផ្សព្វផ្សាយដោយទីភ្នាក់ងារព័តមានរដ្ឋ KCNA ឯក​អគ្គ​រដ្ឋ​ទូត​កូរ៉េខា​ង​ជើង​ប្រចាំ​នៅ​រុស្ស៊ី លោក Sin Hong-Chol បានលើកឡើងថា៖ «នៅទីបំផុត សហរដ្ឋ​អាមេរិក​បាន​ប្រគល់​ប្រព័ន្ធមីស៊ីលបាញ់លើដី ATACMS ឲ្យដល់អ៊ុយក្រែនហើយ បើទោះ​បី​ជា​មាន​ការ​ព្រួយ​បារម្ភ​ខ្លាំង និងការប្រឆាំងយ៉ាងខ្លាំងក្លាពីសហគមន៍អន្តរជាតិក៏ដោយ»។

លោក Hong-Chol បានបន្ថែមថា៖ «រាល់ការវាយប្រហារនៅផ្នែកខាងក្នុងនៃប្រទេសរុស្ស៊ី ដែល​ជា​មហា​អំណាចនុយក្លេអ៊ែរ នឹងមិនជួយបញ្ចប់ស្ថានការណ៍នៅអ៊ុយក្រែនយ៉ាងឆាប់រហ័ស ឬជួយ​ដល់​ដំណោះ​ស្រាយសន្តិវិធី ដូចដែលសហរដ្ឋអាមេរិកលើកឡើងនោះឡើយ ប៉ុន្តែផ្ទុយ​ទៅ​វិញ​នឹង​ក្លាយ​ជា​កត្តា​ជំរុញ​ឲ្យ​តំបន់​អឺរ៉ុប​ទាំង​មូល​ធ្លាក់​ចូល​ទៅ​ក្នុង​ភាព​ច្របូក​ច្របល់​នៃ​សង្គ្រាម​គ្មាន​ទី​បញ្ចប់​ និងការអូសបន្លាយសង្គ្រាមប៉ុណ្ណោះ»។

សូម​បញ្ជាក់ថា បើយោងតាម គេហទំព័ររបស់កងទ័ពសហរដ្ឋអាមេរិក បានឲ្យដឹងថា ប្រភេទ​ថ្មីៗ​ជា​ច្រើន​របស់ ATACMS អាចមានលទ្ធភាពផ្ទុកគ្រាប់បែកចង្កោម។ ប្រព័ន្ធនេះផ្តល់នូវ «សមត្ថភាព​ក្នុងការវាយប្រហារគោលដៅជាមួយនឹងការវាយតម្លៃខ្ពស់ ដោយ​ធ្វើ​ការ​បាញ់​យ៉ាង​ជាក់​លាក់​រហូតដល់ចម្ងាយ ៣០០គីឡូម៉ែត្រ»៕