អ្នកស្ម័គ្រចិត្តអេហ្ស៊ីប បាននាំគ្នាស្រែកអបអរ និងគ្រវីទង់ជាតិយ៉ាងរីករាយ ខណៈ​រថយន្ត​ដឹក​ជំនួយ​ ដែលឈរជើងនៅខាងព្រំដែន Rafah របស់អេហ្ស៊ីប ជាមួយតំបន់ហ្គាហ្សា បាន​ធ្វើ​ដំណើរឆ្លងកាត់ហើយ នៅព្រឹកថ្ងៃសៅរ៍ (ទី២១ ខែតុលា) នេះ។

បន្ទាប់ពីមានជម្លោះការទូតជាច្រើនថ្ងៃ ជុំវិញលក្ខខណ្ឌសម្រាប់ការដឹកជញ្ជូនទំនិញសង្គ្រោះ នៅ​ទី​បំផុត ឡានដឹកជំនួយមនុស្សធម៌ជាច្រើនគ្រឿង ដែលបានជាប់នៅក្នុងប្រទេសអេហ្ស៊ីប បាន​ចូល​តាម​ច្រកព្រំដែន Rafah ឆ្លងទៅតំបន់ហ្គាហ្សាស្ទ្រីប ដែលត្រូវបានឡោមព័ទ្ធ។

ព្រំដែន Rafah គឺជាផ្លូវដ៏សំខាន់ទាំងនៅក្នុង និងក្រៅតំបន់ហ្គាហ្សាស្ទ្រីប ដែល​មិន​ត្រូវ​បាន​គ្រប់​គ្រង​ដោយ​ប្រទេសអ៊ីស្រាអែល ហើយការផ្តោតសំខាន់នៃកិច្ចខិតខំប្រឹងប្រែង គឺការផ្តល់​ជំនួយ​ដល់​ប្រជាជន​ ២,៣លាននាក់របស់តំបន់ហ្គាហ្សា។

សូមរំលឹកថា អ៊ីស្រាអែលបានធ្វើការបិទទាំងស្រុង និងបានបើក​ការ​វាយ​ប្រហារ​ផ្លូវ​អាកាស​លើ​តំបន់​ហ្គាហ្សា ដើម្បីជាការឆ្លើយតប ចំពោះការវាយប្រហារបង្ហូរឈាមលើដែនដីអ៊ីស្រាអែល ពី​សំណាក់​ក្រុម​ហាម៉ាសប៉ាឡេស្ទីន កាលពីថ្ងៃទី៧ ខែតុលា៕