ជម្លោះរវាងប៉ាឡេស្ទីន និងអ៊ីស្រាអែល ដែលកំពុងបន្តមាន បាន​បណ្តាល​ឲ្យ​មាន​សោកនាដកម្ម នៃ​ការ​បាត់បង់ជីវិតមនុស្សជាង ៥.៦០០នាក់ហើយ សម្រាប់ភាគីទាំងសងខាង ខណៈអំពើហិង្សា ដែល​ឆាបឆេះកាន់តែខ្លាំងឡើងៗនេះ បានឈានចូលដល់ថ្ងៃទី១៥ នាថ្ងៃសៅរ៍ (ទី២១ ខែតុលា) នេះ។

យោងតាមទិន្នន័យរបស់អាជ្ញាធរសុខាភិបាលប៉ាឡេស្ទីន កាលពីថ្ងៃសុក្រម្សិលមិញ សង្គ្រាម​នេះ​បាន​បណ្តាល​ឲ្យ​ជនជាតិប៉ាឡេស្ទីនស្លាប់ចំនួន ៤,២១៨នាក់ ដោយអ្នកស្លាប់ចំនួន ៤.១៣៧នាក់ នៅ​តំបន់ហ្គាហ្សាស្ទ្រីប និង ៨១នាក់ នៅវ៉េសប៊ែង។

ទន្ទឹមនឹងនេះដែរ ប្រព័ន្ធផ្សព្វផ្សាយរបស់អ៊ីស្រាអែល ដោយដក​ស្រង់​សម្ដី​ពី​ក្រសួង​សុខាភិបាល​អ៊ីស្រាអែល បានរាយការណ៍ថា យ៉ាងហោចណាស់មនុស្ស ១.៤០០នាក់ បានបាត់បង់ជីវិត នៅ​ខាង​ភាគី​អ៊ីស្រាអែល ក្នុងជម្លោះ នាពេលបច្ចុប្បន្ននេះ។

ជាងនេះ​ទៅទៀត នៅថ្ងៃសុក្រនោះ យោធាអ៊ី​ស្រាអែល​បន្ត​ការ​វាយ​ប្រហារ​តាម​អាកាស​យ៉ាង​សន្ធាប់​ទៅ​លើតំបន់ផ្សេងៗនៃតំបន់ហ្គាហ្សាស្ទ្រីប ដែលបណ្តាលឲ្យមានអ្នកស្លាប់ និងរបួស​កាន់​តែ​ច្រើន​។ កងកម្លាំងការពារជាតិអ៊ីស្រាអែល បានបញ្ជាក់ថា ពួកគេបាន​ធ្វើ​ការ​វាយ​ប្រហារ​ចំគោល​ដៅ នៅព្រឹកថ្ងៃនោះ ដោយបានសម្លាប់វិស្វករជាន់ខ្ពស់របស់ក្រុមហាម៉ាស លោក Mahmoud Sabih ដែលទទួលខុសត្រូវលើការអភិវឌ្ឍអាវុធ នៅតំបន់ហ្គាហ្សាស្ទ្រីប។

ពេញ​មួយថ្ងៃសុក្រ ក្រុមហាម៉ាសបានបន្តបាញ់រ៉ុក្កែតសម្ដៅទៅអ៊ីស្រាអែល ដោយធ្វើឲ្យ​ប្រព័ន្ធ​ការ​ពារ​ដែន​អាកាស Iron Dome របស់អ៊ីស្រាអែលស្ទាក់ចាប់គ្រាប់មីស៊ីលដែលបាញ់ចូលមក។ បន្ទាប់​មក ស៊ីរ៉ែនផ្ដល់សញ្ញាការវាយឆ្មក់ផ្លូវអាកាស បានបន្លឺឡើងនៅក្នុងទីក្រុង និងទីប្រ​ជុំ​ជន​ជា​ច្រើន​របស់​អ៊ីស្រាអែលមួយចំនួន រួមមានទីក្រុង Sderot, Ashkelon និង Ashdod នា​ពេល​ល្ងាច​។​ នាពេលនេះ មិនទាន់មានព័ត៌មានណាមួយទាក់ទងនឹងការស្លាប់ និងរបួស ដែល​បណ្តាល​មក​ពី​ការ​វាយ​ប្រហារទាំងនេះនៅឡើយទេ៕