អុីស្រាអែល ៖ ក្បួនរថយន្ដដំបូង ដែលដឹកជំនួយមនុស្សធម៌បន្ទាន់ ចាប់តាំងពីអ៊ីស្រាអែលបានចាប់ផ្ដើមបំផ្លាញតំបន់ហ្កាហ្សាដែលត្រូវហុមព័ទ្ធអស់រយឡពេល១២ថ្ងៃកន្លងទៅនោះ បានចូលទៅតំបន់ហ៊ុមព័ទ្ធមួយនេះ ដោយចេញពីប្រទេសអេហ្ស៊ីប កាលពីថ្ងៃសៅរ៍ បន្ទាប់ពីការទម្លាក់គ្រាប់បែកយ៉ាងខ្លាំងរបស់អ៊ីស្រាអែល នៅពេលយប់ បានសម្លាប់ជនជាតិប៉ាឡេស្ទីនអស់រាប់សិបនាក់មក។

បន្ទាប់ពីរថយន្ដជាច្រើនគ្រឿង បានឈប់សំចតរយៈពេលខ្លីនៅច្រកម្ខាងនៃតំបន់ហ្កាហ្សាជាប់ព្រំដែនរ៉ាហ្វា(Rafah) ដោយមានការត្រួតពិនិត្យពីអឌ្ឍចន្ទក្រហមប៉ាឡេស្ទីននោះ មានរថយន្ដ២០គ្រឿង បានចាប់ដំណើរឆ្ពោះទៅកាន់ភាគខាងជើង ដោយសំដៅទៅរកអ្នកទទួលក្នុងតំបន់ដែលមានប្រជាជនច្រើនកកកុញ ក្រោយពីភាពជាប់គាំងខាងការទូតប៉ុន្មានថ្ងៃទៅលើស្ថានភាពសម្រាប់ការដឹកជញ្ជូនជំនួយនេះ។

ប៉ុន្ដែចំនួននោះ គ្រាន់តែចំណែកមួយប៉ុណ្ណោះនៃអ្វីដែលជាតម្រូវការក្នុងតំបន់ហ្កាហ្សា ជាទីដែលការឡោមព័ទ្ធទាំងស្រុងរបស់អ៊ីស្រាអែលបានធ្វើឲ្យមនុស្សចំនួន ២,៣លាននាក់អស់ស្បៀង អស់ទឹក ថ្នាំសង្កូវ និងប្រេងឥន្ធនៈ ជាអ្វីដែលអង្គការសហប្រជាជាតិនិយាយថា កំពុងបង្កឲ្យមានគ្រោះមហន្ដរាយមនុស្សធម៌នោះ។

អង្គការសហប្រជាជាតិ បាននិយាយថា ក្បួនដឹកជញ្ជូនជំនួយនេះ រួមមានគ្រឿងផ្គត់ផ្គង់ជួយសង្រ្គោះជីវិត ដែលត្រូវបានទទួល និងចែកចាយដោយអឌ្ឍច័ន្ទក្រហមប៉ាឡេស្ទីន។ ចំណែកក្រុមហាម៉ាស់អ៊ីស្លាមប៉ាឡេស្ទីន ដែលគ្រប់គ្រងតំបន់ហ្កាហ្សានោះ បាននិយាយថា ការដឹកជញ្ជូនមកដល់នេះ រួមមាន ថ្នាំពេទ្យ និងស្បៀងអាហារ ដែលមានកម្រឹតប៉ុន្ដែមិនមានប្រងឥន្ធនៈនោះទេ៕